Muhterem Aras: Mûzîka kurdî bandoreke mezin li ser kesatiya min kiriye

Hewlêr (Rûdaw) – Jineke Kurd ku li herêma Badin Vurtimberge ya Almanya weke seroka parlamentoyê hatiye hilbijartin, behsa bandora mûzkîa Kurdî li ser kesatiya xwe dike. Ev yekemîn car e ku li Almanya jineke biyanî û Kurd posta serokatiya parlamentoyê werdigre.

Muhterem Aras ji sala 1979an ve li gel malbata koçberî Almanya bûye û piştî wergirtina mafê penaberiyê, regezname jî wergirtiye û bûye endama Partiya Keska Almanya.

Muhterem Aras, niha seroka parlamentoya wîlayeta Badin Vurtimberge li Almanya ye. Di hevpeyvînekê de li gel rojnameyeke Almanî, ew jina Kurd  behsa dîroka jiyana xwe û bandora mûzîka Kurdî li ser kesayeta xwe dike û dibêje, mûzîka Kurdî herdemê bîranînên zaroktiya min ên li navçeya Anatoliyayê tînin bîra min û wî cihê ku ez lê ji dayik bûme.

Ew yekemîn jina biyanî ye ku posta serokatiya parlamentoyê li wîlayeteke Almanya werdigre. Muhterem Aras bo rojnameya Tageszeitung a Almanî gotiye ''îro, bajarê Ştûtgart nîştimana min e''. Muhterem Aras dayika keçekê ye û dibêje ''dema ku ez keça xwe hembêz dikim, ew dem têne bîra min ku dayika min ez hembêz dikirim û stranên kurdî ji min re digotin.

Muhterem, nikare bi Kurdî biaxive, ji ber ku salên dûr û dirêj ji zimanê dayikê dûr ketiye, li ser vê yekê jî dibêje, ''ez nikarim bi başî bi zimanê Kurdî biaxivim, bi tenê çend hevok û hejmareke gotinan dizanim''.

Li gorî hin amaran li Almanya zêdetirî yek milyon Kurd dijîn û mezintirîn revenda (diyaspora) Kurdî ya li derveyî welat li Almanya ye.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger