Cîhan
Li ser vexwendina Stoltenberg rayedarên NATOyê dê li Brukselê bi nûnerên payebilind ên Fînlanda, Swêd û Tirkiyê re hevdîtinan bikin.
Hewlêr (Rûdaw) - Serokomariya Fînlandayê ragihand ku hevdîtinên di navbera welatî wî, Swêd û Tirkiyê yên têkildarî endambûna NATOyê dê sibê berdewam bikin.
Li ser hesabê Twîtterê ya Serokomariya Fînlandayê ragihand hevdîtinên di navbera Finlanda, Swêd û Tirkiyeyê de sibê li paytextê Belçîkayê bajarê Brukselê birêve diçin.
Nûnerekî NATOyê jî daxuyanî da ajansa nûçeyan a fermî ya Swêdê TTyê û got li ser vexwendina Sekreterê Giştî yê NATOyê Jens Stoltenberg rayedarên wê hevpeyaniyê dê li baregeha Brukselê bi nûnerên payebilind ên Fînlanda, Swêd û Tirkiyê re hevdîtinan bikin.
Hinceta vetoya Tirkiyê li dijî endambûna Swêd û Finlandayê, beşa herî mezin bi Kurdan ve girêdayî ye.
Enqere îdia dike ku Stockholm û Helsinki, endamên Partiya Karkerên Kurdistanê (PKK) û Yekîneyên Parastina Gel (YPG) vedihewînin û piştgiriya wan dikin, di demekê de Tirkiye wan herdû hêzên Kurdî wek “Rêxistinên terorîst” dibîne, bi wê hincetê jî Enqere ne amade ye rê bide Swêd û Finlandayê ligel Tirkiyê di nav yek hevpeymaniyê de cîh bigrin.
Serokkomarê Tirkiye Recep Tayyip Erdogan pêdagir e li ser wê yekê ku heta Swêd û Finlanda dilgiraniyên Enqerê yên derbarê PKKê de jinav nebin, ew glopa kesk bo endambûna wan herdu welatan pênaxîne.
Enqerê hejmarek daxwaz ji Swêd û Finlandayê kirine
Lîsteyek ku ji aliyê Fermangeha Ragihandinê ser bi Serokatiya Komara Tirkiyê ve hatiye belavkirin, pêşan dide ku Enqerê hejmarek daxwaz ji Swêd û Finlandayê ku eger cîbicîh nekin, wê demê divê destê xwe endambûna NATOyê bişon, ku yên herî serekî evna ne:
-Divê Swêd û Finlanda cezayên ser Tirkiyê rakin, di nav de jî ambargoya firotina çekan, ku ji 2019an ve piştî êrîşa Tirkiyê bo ser Rojavayê Kurdistanê, li ser ferz kirin.
-Bidawîanîna piştgirîkirina siyasî ya terorê “ku armanc jê PKK, YPG û Cemaeta Gulen e.”
-Bidawîanîna “piştgiriya darayî bo PKK û YPGê.”
-Bidawîanîna “Şandina çekan bo PKK û YPGê.”
-Divê Swêd 11 kes û Finlanda jî 6 kesan radestî Tirkiyê bikin ku li gor Enqerê endamên PKKê ne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse