Hewlêr (Rûdaw) - Birêvebiriya Trump ji her demê zêdetir nêzîkî şerekî berfireh ê bi Îranê re bûye.
Medyaya Amerîkayê eşkere dike ku egera êrişa li Îranê ji sedî 90 e û du hefte dem dane Tehranê.
Malpera Axiosê ya Amerîkayê îro di raporekê de eşkere kir, piştî ku dan û standinên Cenevreyê nekarîn nakokiyên kûr û xetên sor ên Washingtonê çareser bikin, amadehiyên leşkerî yên Amerîkayê li herêmê gihîştine asteke metirsîdar.
Li gorî raporê, hêza leşkerî ya Amerîkayê ku wekî "Artêşa Trump" tê binavkirin, niha du keştiyên balafirhilgir, 12 keştiyên şer, bi sedan balafir û çendîn pergalên parastina asmanî li xwe digire.
Her wiha li gorî zanyariyan, tenê di nava 24 demjimêrên borî de, 50 balafirên şer ên ji cureyên F-35, F-22 û F-16an gihîştine herêmê.
Alîkarê Serokê Amerîkayê J.D. Vance jî ji Fox Newsê re amaje bi wê yekê kir ku tevî hinek bipêşveçûnên di dan û standinên li Cenevreyê de hene lê xetên sor ên Trump nehatine qebûlkirin.
Vance got, "Hinek xetên sor hene ku Serok Trump destnîşan kirine û Îranî heta niha ne amade ne wan qebûl bikin yan jî li ser wan bixebitin.
Di serê van xetan de ew tê ku divê Îran ti carî nebe xwedî çeka atomî.
Serok wî mafê xwe diparêze ku bibêje kengî dîplomasî gihîştiye dawiya xwe ya xwezayî.
Ez hêvî dikim em negihîjin wê xalê lê eger em bigihîjin, ev dê bi temamî biryara Serok be."
Yek ji şêwirmendên Trump ji Axiosê re ragihandiye, "Her çend hinek kes li derdora wî (Trump) hişyariya şer didinê lê ez bawer im bi rêjeya ji sedî 90 em dê çalakiyên leşkerî bibînin."
Washingtonê du hefte dem dane Tehranê da ku pêşniyareke nû pêşkêş bike, eger na dê bijardeya leşkerî were hilbijartin.
