BELÇÎKA - Leyla Çildergûşî: Em zarokan fêrî zimanê Kurdî dikin
Hewlêr (Rûdaw) - Berpirsa Mala Êzidiyan a Belçîkayê Leyla Çildergûşiyê diyar kir ku karê wan ê serekî ew e ku zarokên Kurdan fêrî Kurdî dikin.
Deh saliya avakirina Mala Êzidiyan a Belcîkayê hat pîrozkirin.
Ew mal sala 2014aan hat avakirin di vê Mala Kurdên Êzidî de çand û kultûra Êzidiyan bi welatên Ewropî tê nasandin.
Di vê male de pêşangeha karên destî jî tên vekirin, zarok jî fêrî zimanê Kurdî dibin.
Bi boneya salvegera 10emîn a Mala Êzidiyan gelek çalakiyên cuda hatin lidarxistin.
Zarokên ku li malê fêrî Kurdî bûne û helbestvanên jin di merasîmê 10 saliyê de helbest xwendin.
Berpirsa Mala Êzidiyan a Belçîkayê Leyla Çildergûşî bû mêvana Bultena Bakur a Rûdawê û pirsên Dildar Herkî bersivandin.
Li gorî gotina Leyla Çildergûşiyê ew bêhtir hewl didin alîkariyê bidin Kurdên Êzidî yên li Ewropayê.
Berpirsa Mala Êzidiyan a li Belçîkayê amaje bi dîroka damezirandina Mala Êzidiyan jî kir û wiha got:
“Me Mala Êzidiyan a Belçîkayê piştî Komkujiya Şingalê ava kir.
Êrişa terorîstên DAIŞê, terorîstên îslamîst ên tûndrew bandor li ser hemû Êzidiyan û li hemû Kurd û Kurdistanê kir.
Wekî Kurdên Êzidî yên li Belçîkayê me jî xwest em tiştekî bikin.
Me xwest, em Êzidiyan bi Ewropiyan bidin nasandn. Kî ne Êzidî? Dîroka wan çi ye? Bîr û bawweriya wan çi ye?
Em gelekî xebitîn, me semîner li dar xistin û me konserên mezin ên alîkariyê li dar xistin.
Me konsera xwe pêşkêşî Kobanî û Şingalê kir û ew pereyê hat komkirin me şand Herêma Kurdistanê.
Em semîneran, konferansan, pêşangeh û şevan li dar dixin.”
“Em alîkariyê didin zarokan”
Leyla Çildergûşiyê amaje bi wê yekê kir ku karê wan ê serekî fêrkirina Kurdî ye û wiha berdewam kir:
“Karê me yê serekî fêrkirina Kurdî ye. Kurdên Êzidî yên ku tên Ewropayê piranî li Almanyayê bi cih dibin.
Kêm kes hatine Belçîkayê. Em alîkariya zarokan Şingalê jî dikin, em ji zarokan re malzameyên dibistanê dikirin, dermanan dişînin.
Pêwîst e em zarokan fêrî Kurdî bikin, dema Kurdên me yên Êzidî yên Ermenistanê, Gurcistanê tên Ewropayê ziman nizanin.
Em qonax bi qonax zimanê xwe fêrî zarokan dikin. Em dixwazin xelkê me zimanê xwe û dîroka xwe bizanibin.
Em bi rêya pêşangehan dixwazin xelkê Ewropayê jî me nas bikin bizanibin bê ka Êzidî kî ne.
Muhîm ew e ku zarokên me bizanibin bê ka ew kî ne.”