Serokwezîrê Nemsa: Divê Ewropa giringiyê bide çareserkirina pirsgirêkên Hewlêr û Bexdayê

Bruksel (Rûdaw) – Serokwezîrê Nemsayê ragihand, giring e ku Yekîtiya Ewropayê gelek giringiyê bi çareserkirina pirsgirêkên Hewlêr-Bexdayê bide.

Di dema birêveçûna civîna lûtke ya Yekîtiya Ewropayê de, Serokwezîrê Nemsayê Christian Kern di konfranseke rojnamevanî de li ser pêwîstiya çareserkirina pirsgirêkên navbera Herêma Kurdistanê û Iraqê axivî.

Christian Kern di vê konfransa rojnamevanî de bersiva pirseke Rûdawê ya derbarê hewlên Yekîtiya Ewropayê bo çareserkirina pirsgirêkên navbera Hewlêr û Bexdayê de da.

Kern ji Rûdawê re ragihand, gelek giring e ku Ewropa giringiyê bi vê mijarê bide û pirsgirêkên navbera Hewlêr û Bexdayê çareser bike.

Serokwezîrê Nemsayê herwiha bi pêwîst jî da zanîn, weke hewlên xwe yên bo çareserkirina pirsgirêkên Iraqê, divê Yekîtiya Ewropayê pirsgirêkên Yemen û Lubnanê jî çareser bike.

Pirsa Rûdawê û bersiva Serokwezîrê Nemsayê weke xwe:

Peyamnêra Rûdawê li Brukselê Ala Şalî: Nemsa heta çi qasî hewl dide ku pirsgirêkên navbera Herêma Kurdistanê û Bexdayê çareser bike?

Serokwezîrê Nemsa Christian Kern: Bi rastî ev yek gelek giring e ku Ewropa xemxorê wê pirsgirêkê be, her weke ya Iraqê pêwîst e xemxorê arîşeyên Lubnanê be ku niha Serok Macron mijûlî wan e. Herwiha Yemen jî giring e. Bêguman Iraq û navçeya we jî giring e ku pirsgirêkên wê werin çareserkirin.

S.S

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger