Trump: Divê şerê Rûsya û Ukraynayê biqede

Hewlêr (Rûdaw) - Donald Trump diyar kir ku ew dê meyla xwe bide şerên li seranserê cîhanê û got, “Divê şerê Rûsya û Ukraynayê biqede.”

Donald Trumpê ku cara duyem hat hilbijartin û bû serokê 47an ê Amerîkayê, li eyaleta Floridayê li galaya “America First Policy”ê axivî.

Trump amaje bi şerên li cîhanê kir û got, “Em dê gelekî li ser Rûsya û Ukraynayê bixebitin. Divê êdî (şer) xelas bibin. Divê şerê Rûsya û Ukraynayê biqede.”

Donald Trump diyar kir ku wî raporek dîtiye û li gorî wê raporê di şerê Rûsya û Ukraynayê bi hezaran kes tên kuştin ku sivîl jî di nav wan de hene.

Trump destnîşan kir, ew dê bala xwe bide bûyerên ku li Rojhilata Navîn jî rû didin.

Donald Trump anî zimên ku wan 5ê Çiriya Paşîn serkeftineke mezin bi dest xistiye û li pey çû:

“Serkeftina herî mezin a siyasî ya 129 salan e. Me hemû eyaletên girîng standin. Em di dengdana gel de jî bi ser ketin.”