Hewlêr (Rûdaw) – Serokê Herêma Kurdistanê Nêçîrvan Barzanî bi şandeyeke parlamenterên Almanyayê re civiya.
Alîkarê Serokê Frakisyona Partiyên Yekîtiya Demokrat a Xirîstiyan (CDU) û Yekîtiya Civakî ya Xirîstiyan (CSU) Johan Wadepol serokatiya şandeya parlamenterên Almanyayê kir.
Li gorî daxuyaniya Serokatiya Herêma Kurdistanê, Nêçîrvan Barzanî ji bo piştgirî û hevkariyên wê yên berdewam ên siyasî, ewlehî, leşkerî û mirovî yên ji bo Herêma Kurdistanê spasiya Almanyayê kir.
Serokê Herêma Kurdistanê bal kişand ser rola girîng a Almanyayê di dabînkirina pêdiviyên giring ên leşkerî û lojîstîkî ji bo Pêşmerge yên di şerê li dijî DAIŞê de.
Nêçîrvan Barzanî ji bo dirêjkirina erkê hêzên Almanyayê yên li Herêma Kurdistanê spasiya Parlamentoya Almanyayê kir.
“Alîkariya Almanya ya ji bo Herêma Kurdistanê dê berdewam bike”
Endamên şandeya Parlamentoya Almanyayê pabendiya Almanyayê ji bo berdewamiya piştgiriya Îraq û Herêma Kurdistanê tekez kirin.
Şandeya parlamenteran her wiha amaje bi girîngiya berdewamiya hevkariyê ji bo rûbirûbûna metirsiyên ewlehiyê û xurtkirina hevkariyê di sektorên girîng de kirin.
Konferansa Ewlehiyê ya Munîhê
Konferansa Ewlehiyê ya Munîhê (MSC) îsal cara 61ê di navbera 14-16ê Sibatê de tê lidarxistin.
Di rojeva konferansê de “plana aştiyê ya Donald Trump a ji bo Ukraynayê” û “rewşa Rojhilata Navîn” dê cih bigirin.
Konferansa Ewlehiyê ya Munîhê (MSC) dê di warê ewlehî û siyaseta derve de bibe mezûvana nîqaşên girîng ên cîhanî.
MSC yek ji konferansên herî girîng ên ewlehiyê yên cîhanê ye û cara ewil sala 1963yan hatibû lidarxistin.
Her sal bi sedan rêberên girîng ên cîhanê beşdarî vê konferansê dibin û pirsgirêk û gef û metirsiyên ewlehiyê yên cîhanî dinirxînin.
Konferans di nêzîkirina perspektîvên cuda û zêdekirina baweriya di navbera welatan de roleke girîng dilîze.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse