Hewlêr (Rûdaw) - Wezîrên enerjiyê û petrolê yên Rêxistina Welatên Petrolê Hinarde Dikin (OPEC) û koma OPEC+ ku ji hin welatên berhemhênerên neftê pêk tê, biryar dan ku ji meha Mijdarê ve berhemanîna rojane ya neftê 2 milyon bermîl kêm bikin.
Li paytexta Awusturya, Viyanayê wezîrên enerjî û petrolê yên 13 welatên OPECê bi serokatiya Erebistana Siûdî û 10 welatên ne endamê OPECê yên berhemhênerên petrolê bi serokatiya Rûsyayê ji bo nirxandina şert û mercên bazarê û gotûbêjkirina miqdara hilberîna ji meha Mijdarê ve 33yemîn Civîna Wezîran hate kirin.
Di daxuyaniya nivîskî ya OPECê de hat ragihandin ku hilberîna neftê ya rojane ji Mijdara 2022an pê ve 2 milyon bermîl hatiye kêmkirin.
Di daxuyaniyê de hat diyarkirin ku biryarên di civîna 19emîn a OPECê û welatên derveyî OPECê de hatin girtin wê dewam bikin û hat gotin ku civîna wezîran a OPEC+ wek beriya Covid-19ê wê 6 mehan carekê were kirin.
Hat destnîşankirin ku civîna bê ya ku dê wezîrên enerjî û petrolê yên welatên OPEC û yên derveyî OPECê beşdar bibin dê di 4ê Berfanbarê de bê lidarxistin.
Di civîna berê de, welatên grûpa OPEC+ biryar dabûn ku hilberîna neftê di meha Cotmehê de rojane 100 hezar bermîl were kêmkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse