Hewlêr (Rûdaw) – Wezareta Derve ya Amerîkayê rapora xwe ya derbarê azadiya olî ya sala 2021an belav kir ku di beşekê de behsa Iraq û Herêma Kurdistanê dike. Wezareta Derve ya Amerîkayê di raporê de rexne li helwesta ‘xirab’ a PKKê û Heşdî Şeibî li Şingalê girt.
Wezareta Derve ya Amerîkayê diyar kir ku sînordarkirinên li ser azadiya olî li derveyî Hikûmeta Herêma Kurdistanê berdewam in û got “Komên olî yên kêmîne yên wek Xiristiyan û Êzidî, amaje bi wê yekê kirine ku hebûna komên çekdar ên nêzîkî PKK û çekdarên Heşdî Şeibî jiyana welatiyan xistiye metirsiyê."
Di rapora de hatiye destnîşankirin ku Destûra Iraqê Îslam wek dînê fermî qebûl dike û amaje pê dike, nabe ti qanûneke ku derkeve berovajî prensîbên Îslamê be. Destûr her wiha behsa azadiya ol û pêkanîna wê ji bo hemû kesan dike, di nav wan de Misilman, Mesîhî, Êzidî û Sabiî hene lê bi eşkere behsa peyrewên olên din û nebawermendan nake.
Di raporê de hat gotin, "Sînordarkirinên li ser azadiya olî li derveyî herêmên di bin kontrola Hikûmeta Herêma Kurdistanê de berdewam in. Li gorî kesayetiyên olî û nûnerên rêxistinên sivîl, hêzên ewlekariya Iraqî, tundî û tirsandin li dijî endamên komên kêmîneyan hatine kirin."
Amerîka salane li ser azadiya olî ya li seranserî cîhanê raporekê belav dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse