Moskow (Rûdaw) – Serokê Rûsyayê Vladimir Putin li ser şerê Sûriyê ragihand: “Bêyî Amerîka, ne mimkun e ev mijar bi awayekî yekser çareser bibe.”
Li Rûsyayê bajarê Soçî, Şêwirmenda Almanyayê Angela Merkel û Serokê Rûsyayê Vladimir Putin konferanseke rojnamevaniyê li dar xistin.
Putin di daxuyaniya xwe de diyar kir, ku divê berpirsên êrîşa kîmyayî ya Xan Şeyxûnê werin dîtin û werin cezakirin.
Vladimir Putin got: “Em bikaranîna çekên kîmyayî şermezar dikin. Divê berpirsên êrîşa bi çekên kîmyayî ya li Idlibê werin dîtin û werin cezakirin.”
Herwiha Putin destnîşan kir: “Em hewl didin, ji bo ku li Sûriyê şer û pevçûnê bidin sekinandin, şert û mercên herî baş pêk bînin.”
Putin wiha dirêjî da axaftina xwe:
“Divê em biaxavin, ji bo ku bi hemû hêzên siyasî di qada polîtîk de danûstandinê bikin pêwîst e çi şert û merc werin pêkanîn. Armaca sereke, dabînkirina agirbestê ye helbet. Em weke beşek ji pêvajoya Astanayê, bi hevkarên xwe yên Îran û Tirkiyê re, hewl didin ku li herêmê agirbestê pêk bînin.
Ev xebat li gor pêvajoya Cinêvê têne bicihkirin. Helbet bêyî Amerîka ne mimkun e ev mijar bi awayekî yekser çareser bibe. Ji ber vê jî em bi hevkarên xwe yên Amerîkayê re danûstandinan didomînin, li wê herêma hesas, divê gav bi gav were meşîn.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse