Koçberên li Îtalyayê / Wêne: Ajans
Dusseldorf (Rûdaw) - Dadgehê biryareke Wezareta Karên Navxweyî ya Îtalyayê ya derbarê damezirandina koçberan red kir.
Pêwîstiya Wezareta Karên Navxweyî ya Îtalyayê bi nêzîkî hezar û 300 karmendên nû heye.
Ji bo vê yekê jî bangewaziyeke mezin ji bo berdestkirina derfetên kar kiriye.
Yek ji mercên wergirtina di wê wezaretê de ew bû ku divê kesê daxwazkar welatiyê Îtalyayê be.
Hinek ji kesên ku li Îtalyayê dijîn û ne welatî ne, li dijî wê biryarê gilîname li dadgeheke bajarê Mîlanoyê tomar kir.
Rojên borî dadgehê biryar da ku mercê Wezareta Karên Navxwe ya Îtalyayê ne qanûnî ye.
Ji ber vê yekê niha ewên ku bi awayekî yasayî li wî welatî dijîn, ango welatînameya wan a welatekî din ê Yekîtiya Ewropayê heye yan jî mafê wan ê mana li Îtalyayê heye, ji bo karkirina li Wezareta Navxwe heman mafê wan heye wekî kesên ku welatiyên Îtalyayê ne.
Dadgeha Mîlanoyê dibêje ku biryara xwe li ser bingeha gelek biryarên berê yên dadgehên Ewropayê ku di mînakên hevawa de derketine, daye.
Her wiha dibêje ji ber ku ew derfetên kar ku hatine pêşkêşkirin zêdetir karê kargêrî, darayî û zimanvanî ne, ti pirsgirêk nîne eger kesek ku ne welatiyê Îtalyayê ye wan bike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse