Hewlêr (Rûdaw) - Şêwirmendê Ewlehiya Neteweyî ya Amerîkayê Jake Sullivan got, “Koşka Spî piştgiriya Kurdistaneke bihêz û mafên wê yên destûrî dike.”
Serokwezîrê Herêma Kurdistanê Mesrûr Barzanî doh êvarê bi Şêwirmendê Ewlehiya Neteweyî ya Amerîkayê Jake Sullivan re civiya.
Hikûmeta Herêma Kurdistanê li ser civîna Mesrûr Barzanî û Jake Sullivan Daxuyaniyek belav kir.
Li gorî daxuyaniyê Jake Sullav ragihand ku Joe Biden “silav û rêzên xwe pêşkêşî Serok Barzanî û Serokwezîr dike û tekez kiriye ku Koşka Spî piştgîriya Kurdistaneke bihêz û mafên destûrî yên gelê Kurd dike.”
Herwiha di daxuyaniyê de hate ragihandin ku Sullivan “pesna mêrxasî, têkoşîn û qurbanîdana Pêşmerge bi taybetî di şerê li dijî DAIŞê de daye û tekezî li ser parastina ewlehiya Herêma Kurdistanê û dabînkirina budce û mafên darayî yên herêmê kir.”
“Divê rêz li statuya destûrî ya Herêma Kurdistanê bê girtin”
Serokwezîr Mesrûr Barzanî spasiya piştevaniya Amerîkayê kir wiha pê de çû:
“Divê rêz li statuya destûrî ya Herêma Kurdistanê bê girtin û mafên pêkhateyên Kurdistanê bên parastin û neyên binpêkirin.”
Di hevdîtinê de Serokwezîr herwiha tekezî li ser girîngiya cîbicîkirina destûrê û avakirina Encûmena Federalî ya Îraqê kir.
Serokwezîrê Herêma #Kurdistan`ê Mesrûr #Barzanî bi Şêwirmendê Ewlehiya Neteweyî ya #Amerîka`yê Jake #Sullivan re civiya pic.twitter.com/SdRRmj4ZPU
— RudawKurdi (@RudawKurdi) March 1, 2024
Mesrûr Barzanî bi Brett McGurk re jî civiya
Li aliyê din, Serokwezîrê Herêma Kurdistanê Mesrûr Barzanî bo Koordînatorê Koşka Spî yê Karûbarên Rojhilata Navîn û Bakurê Afrîkayê Brett McGurk re jî civiya.
Li gorî daxuyaniya Hikûmeta Herêma Kurdistanê, “Mesrûr Barzanî û Brett McGurk li ser giringiya parastina ewlehî aramiya Herêma Kurdistanê, rêzgirtina statuya destûrî û federaliya Herêma Kurdistanê û parastina mafên pêkhateya hev ra bûn.”
