Hewlêr (Rûdaw) - Serokê Odeya Dermanxaneyan a Manisayê Devrim Bali ragihand ku qeyrana derman kûrtir dibe û eger tedbîr neyên wergirtin dê metirsiyeke zêde li ser tendirustiya xelkê çê bibe.
Li Tirkiye û Bakurê Kurdistanê, di serî de antîbiyotîk, êşbir û dermanên sermayê li gelek dermanxaneyan peyda nabin û yên heyî jî hêdî hêdî diqedin.
Serokê Odeya Dermanxaneyan a Manisayê Devrim Bali bal kişande ser qeyrana derman û got: “Eger bilez tedbîr neyên wergirtin û rê li ber qeyranê neyê girtin dê di rojên pêş de metirsiyeke zêde li ser tendirustiya xelkê çê bibe. Qeyran her roj kûrtir dibe. Niha bi sedan derman li depo û dermanxaneyan nînin.”
Devrim Bali dibêje, di demekê de ku nexweşiyên şewbê zêde bûne nebûna dermanan gihiştiye astekê ku li ser tendirustiya xelkê bûne gef. Bali got: “Nexweş mexdûr in, dermanxane mexdûr in, pizîşk mexdûr in. Eger tedbîr neyên wergirtin dê rewş aloztir bibe. Bila berpirs biçin dermanxaneya herî nêzîk û rewşê bibînin. Bila bibînin ku nexweş bi reçeteyan ji bo dermanekî antîbiyotîk dermanxane dermanxane digerin.”
Bali derbarê sedemên qeyrana dermanan de jî dibêje: “Sedema herî mezin gotegotên zêdekirina bihayan e. Kompanya ji ber wê derman nadin bazar û di destê xwe de radigrin. Ji ber dewlet jî pereyekî kêm dide dermanan, kompanya kêm berhem tînin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse