Nexweşên penceşêrê li Rojhilatê Kurdistanê nikarin dermanan bikirin

Hewlêr (Rûdaw) - Îsal bi sedema kirîza aborî ku li Îranê heye, nexweşên bi penceşêrê ketine, gelek zehmetiyan dibînin. Bi tayebt ku buhayê tûmen li hember diravên biyanî gelek daketiye, nirxên dermanan çend qat zêde bûne.

Welatiyên Rojhilatê Kurdistanê yên ku bi nexweşiya penceşêrê ketine, dibêjin ku wan şiyana kirîna dermanan nîne.

Herwiha ji ber rewşa xirab a aboriya Îranê, derziyên taybet bi nexweşiya penceşerê gelek giran bûne û nirxê wan derziyan niha li Îranê di navbera milyonek heta 5 milyon tûmenî de ye.

Hikûmeta Îranê vê yekê dixe stuyê dorpêçên aborî yên Amerîkayê yên li dijî wî welatî, lê Amerîkayê ragihandiye, wan sektora tendirûsiyê nexistiye nav dorpêçên xwe de, û hikûmeta Îranê bi xwe naxwaze xelkê wê sûdê ji vê lêxweşbûnê bibîne.

Piştî ku Amerîka ji rêkevtina etomî ya li gel Îranê vekişiya, çend sizayên aborî bi ser wî welatî de sepand, ku di encama wan sizayan de, buhayê pereyê wî welatî gelek daketiye û rewşa aboriya wî welatî jî pir xirab bûye.

Wê rewşa xirab a aborî bandoreke nerênî li nexweşên penceşêrê jî kiriye û ew nikarin derman û derziyên pêdivî yên bo dermankirina nexweşiya xwe dabîn bikin. 

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger