Hewlêr (Rûdaw) – Li parêzgeha Çewlîgê Tîmên Tendirustiyê li ser rê ajokar û rêwiyan vaksîn dikin û welatî jî li hember vê kampanya derzîkirina li dijî Coronayê kêfxweş in.
Tîmên tendirustiyê li ser rê rawestiyan e û pirsa vaksînê ji ajokar û rêwiyên ligel wan dikin. Ev yek ji rêyên parêzgeha Çewlîgê ya Bakurê Kurdistanê ye ku tîmên Tendirustiyê bi vê hewla xwe dixwazin rûbirûyî belavbûna zêdetir ya Coronayê bibin û ajokar û rêwiyên ligel wan ji bo wergirtina vaksînê razî bikin.
Dr. Muhammet Enes, Pizişk, dibêje, “Em niha li xala kontrolê ya Kervansaray in û ji bo xebatên vaksînê hatine. Em bi ambulansekê û 5 karmendan li vir kar dikin. Em welatiyan vedixwînin ambulansê û di ambulansê de wan vaksîn dikin. Îro xebatên me li vê derê bi vî awayî ne lê ji xeynî vê yekê 4 tîmên me li gundan jî kar dikin. Ew jî bi heman awayî li gundan kar û xebatên vaksînê birêve dibin.”
Di nexşeya Wezareta Tendirustiyê ya Tirkiyê de, parêzgeha Çewlîgê di warê belavbûna Coronayê de yek ji parêzgehên herî metirsîdar e û di rêza 7emîn de cî digire. Welatiyên wê parêzgehê jî bi vê hewla karmendên tendirustiyê keyfxweş in û spasiya wan dikin.
Murat Koşunalp, Welatî, dibêje, “Min doza xwe ya yekem a vaksînê wergirt. Ez sipasiya xebatkarên tendirustiyê dikim. Gelek spas.”
Li gor amarên Wezareta Tendirustiya Tirkiyê di 24 demjimêrên dawî de 284 kesan ji ber Coronayê canê xwe ji dest dane û 23 hezar û 496 hezar pêketiyên nû hatine tomarkirin.
Hevdem ji destpêka Coronayê heta niha her sê doz di nav de 95 milyon û 565 hezar û 306 dozên vaksînê li ser welatiyên Tirkiyê û Bakurê Kurdistanê hatine dabeşkirin. Di demekê de, li parzêgeha Çewlîgê rêjeya kesên herî kêm dozeke vaksînê wergirtine tenê ji sedî 64.5 e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse