Fîçer - Çîroka hunermenda Rojhilatê Kurdistanê Tirîfe Emîrî

Bi dengê xwe yê xweş û nazik guhdarên xwe dibe cîhaneke din. Tirîfe Emîrî sala 1989an li malbateke hunerî ya bajarê Mehabadê hat dinyayê. Ji zarokatiya xwe ve li malê stran digotin. Ev demek e bi xwendina stranên hunermendên din hatiye meydana karê hunerî.

Tirîfeyê dibistana xwe li bajarê Mehabadê qedandiye û bawernameya beşa IT li Koleja Tewrêzê wergirtiye. Piştre li Sablaxê dest bi kar kiriye û bi karê xwe re hunera xwe jî domandiye.

Ji bilî dengê wê yê xweş, Tirîfe Emîrî amûra ûdê jî dijene. Dema xwendekar bû, di nav hevalên xwe de û ji bo mamosteyan jî stran digotin.

Vê keça hunermend a Rojhilatê Kurdistanê, tu beşeke akademîk a hunerê nexwendiye, lê bi awayekî zikmakî bi bav, bira û metikên xwe re dest bi stranbêjiyê kiriye.

Piraniya hunermendên Kurd gava cara yekem dest bi strangotinê kirine, bi xwendina heyranok û besteyên Kurdî dest pê kirine. Ji bilî ku dengekî wê yê xweş ji bo stranbêjiyê heye, Tirîfe heyranok û besteyan jî bi awayekî taybet dixwîne.

Tirîfe Emîrî yekem karê xwe yê hunerî ligel Elî Sixawetî bi duet weşandiye û bi piraniya komên muzîkê re stran gotine.

Niha hunermendeke Kurd a navdar e ku li Rojhilatê Kurdistan, Îran û tewra Başûrê Kurdistanê jî beşdarî piraniya festîval û muzîka gelan bûye. Herwiha çend klîb jî derxistine.

Emîrî dixwaze bi dengê xwe arşîva stran û muzîka Kurdî dewlemendtir bike.