Fîçer - Îbrahîm Ehmedî: Jenyarekî Kurd bi Defa Xwe Muzîka Kurdî û Fransî Tevlihev Dike

Îbrahîm Ehmedî, jenyarê Kirmaşanî xwediyê bawernameya masterê ye di derûnnasiyê de ji Zanîngeha Tehranê, ji sala 2016an ve li bajarê Bordoyê Fransayê dijî û li wir muzîka Kurdî bi cîhanê dide naskirin.
Ev jenyarê ku sala 1982yan ji dayik bûye, berî koçkirina xwe ya Fransayê, li Rojhilatê Kurdistanê bi du komên muzîkê re kar kiriye û komeke muzîkê bi navê "Viyan"ê damezrandiye. Niha bi sê komên muzîkê yên Fransî re kar dike, ku ya herî girîng ji wan koma "Mîksî" ye.
Birêvebirê Koma Mîksî dibêje: "Min bi rêya Îbrahîm Kurdistan û dîroka wê nas kir. Ji wê çaxê ve min dest bi xwendina li ser Kurdistanê kir. Bi muzîka Îbrahîm re, min muzîka Kurdistanê û amûrên wê nas kirin, her wiha têgihiştim bê çi çand û çi dîrokê ev muzîk berhem aniye."
Îbrahîm ku dahol, def û sêtarê dijene, zêdetir bi defa xwe tê naskirin. Di konsertên wî yên serkeftî de li bajarê Blayê, Lorêna Zêkêrî ku welatiyeke Fransî ye, dibêje: "Strana Kurdî gelekî taybet e, tijî hest û soz e. Ji bo me tiştekî cuda û çêjbexş e."
Artur Zqîrî, jenyarê viyolînê yê Albanî ku zêdetirî 50 salî ezmûna wî heye, dabaşa têkiliya di navbera muzîka Kurdî û Balkanî de dike û dibêje: "Bavê min di pirtûka xwe ya li ser dîroka muzîka Balkanê de, qala bandora muzîka Kurdî li ser muzîka wê deverê kiriye."
Niha Koma Mîksî mijûlî tomarkirina albûmeke nû ye ku sê stranên Kurdî li xwe digire. Tomas Mazolyê, yek ji jenyaran e û dibêje: "Strana Kurdî ji bo me rojavayiyan pir zehmet e, lê em gelekî hewl didin ku muzîkê wek ya resen bijenin."