Hewlêr (Rûdaw) - Li parêzgeha Stenbolê ya Tirkiyeyê piştî barana gur lehî rabû û li çend navçeyan zerereke zêde çêbû.
Li piraniya bajarên Tirkiyeyê baran berdewam e û li gelek parêzgehên Tirkiyeyê lehî rabû.
Li Stenbolê ji ber lehiyê avahiyek hilweşiya û çend xanî ji ber metirsiya hilweşînê hatin valakirin.
Ji ber baranê pirsgirêkên trafîkê çêbûn û mal di bin avê de man.
Welatiyê bi navê Menderes Yilmaz li ser lehiyê got:
“Em li malê bûn. Ez û hevjîna xwe rûdiniştin. Dengek hat, min nizanibû çi bû. Hevjîna min got xanî xira bû.
Em bi zehmetî derketin derve. Hemû kelûpelên me di bin av û heriyê de man. Em niha li cem cîranan dimînin.”
Li parêzgeha Bursayê jî bi sedan kargeh û mal di bin avê de man û bi dehan otomobîl li ber avê çûn.
Li Bursayê ji şeva borî ve serê metre çargoşeyê 55 kîlogram baran bariya.
“30 kargehan zerereke cidî dît”
Parêzgarê Bursayê Mahmut Demirtaş anî ziman:
“16 welatiyên me asê mabûn, me ew rizgar kirin û veguhastin cihekî ewle. 2 welatiyên me bi sivikî birîndar bûbûn.
30 kargehan zerereke cidî dît. Herwiha zerer gihiştiye 10 mal û 20 otomobîlan jî.”
Ji bilî Stenbol û Bursayê li parêzgehên Balikesir û Aydinê jî ji ber lehiyê zerereke zêde çêbû.
Li her du parêzgehan jî mal, kargeh û kolan di bin avê de man.
Saziya Keşnasiyê ya Tirkiyeyê roja pêncşemê ji bo herêmên Marmara, Ege û Deryaya Reş ên Tirkiyeyê hişyariya barana gur û lehiyê da.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse