Geşyareke li Stenbolê / Wêne û vîdeo: Rûdaw
Stenbol (Rûdaw) - Bi hezaran geştyarên biyanî û xelkê Stenbolê ji bo nimêja cejnê berê xwe da Mizgefta Ayasofya û Sultanahmetê.
Hinek geştyarên ji welatên wekî Misir û Fasê heta Îraq û Herêma Kurdistanê jî kesên ji bo betlaneya cejnê çûne Stenbolê hene.
Hin ji wan bi taybetî jî welatiyên Afrîqî bi cil û bergên xwe yên neteweyî çûn nimêja cejnê.
Piştî nimêjê xelkê cejna hev pîroz kir û şekir belavî hev kir. Geştyar ji xeynî deverên olî dê deverên dîrokî yên Stenbolê jî bigerin.
Ji ber ku di betlaneya 9 rojî ya Cejna Remezanê de bi sed hezaran niştecihên Stenbolê berê xwe daaye bajarên xwe Stenbol hinek vala maye û ji her carê zêdetir aram bûye.
Ev dîmenên rengîn ku ji kal û pîr, jin û mêr û ciwan û zarokan pêk tê li pêşiya Mizgefta Ayasafoyayê ya Stenbolê ye.
“Stenbol bo ger û geştê pir xweş e”
Geştyarê ji Herêma Kurdistanê Muslum Ebdulsettar got:
“Ez ji Hewlêrê hatim vir wekî geştyar. Em dê cejna xwe li vir derbas bikin. Stenbol bo ger û geştê pir xweş e.”
“Em ji bo Xezeyê nedin jibîrkirin li vir in”
Berdevkê Yekîtiya Xwendekarên Misirê Mumîb Şerîf jî got:
“Em wekî Yekîtiya Xwendekarên Misirê, ji bo em Filistîn û Xezeyê nedin jibîrkirin li vir in.
Em diyariyên wiha belav dikin ji bo alîkariya Sûriye û Filistînê.”
Geştyarê ji Mexrîbê Yusra jî got, “Em ji Mexrîbê hatin vir. Atmosfera li Stenbolê pir xweş e. Cejna hemû alema Îslamê pîroz be.”
Zarok jî bi malbata xwe re ji navçeyeke dûr a Stenbolê çûn mizgefta Ayasofyayê.
Xelkê piştî nimêjê şekir belavî zarokan dikin.
“Ji bo zarok kêfxweş bibin em şekir belav dikin”
Nişteciha Stenbolê Meryem Alkanê jî got:
“Em ji navçeya Sultangaziyê ya Stenbolê hatin vir. Ji bo zarok kêfxweş bibin em şekir belav dikin. Ez herî zêde ji meha Remezanê hez dikin.”
“Divê li cîhanê aştî çêbibe”
Ji xeynî geştyar û turistên biyanî, li Tirkiyeyê geştyarên navxweyî jî ji bajarên derdorê berê xwe didin Stenbolê.
Geştyarê navxweyî Emîne Demîrê jî got, “Cejn ji bo lihevkirin û aştiyê ye. Yanê aştî tiştekî pir xweş e.
Divê li cîhanê aştî çêbibe ku mirov karibin bi bextewarî li her cihê cîhanê bigerin.”
Geştyarê navxweyî Ahmet jî got, “Ez ji Amedê hatime. Ayasofosya pir xweş bû. Em dê niha jî li Stenbolê bigerin. Cejna hemû Kurdistanê pîroz be.”
Li gorî Wezareta Çand û Turîzmê, di heyama mehên Çile û Sibata 2025an de, hejmara geştyarên biyanî ku çûne serdana Stenbolê ji 2 milyon û nîvê derbas kiriye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse