Erdogan / Wêne: Arşîv
Hewlêr (Rûdaw) - CHP û DEM Partî bangî Erdogan dikin ku êdî ew li ser mijara “pêvajoya aştiyê” biaxive.
Serokê Giştî yê MHPyê Devlet Bahçelî 1ê Çiriya Pêşîn li Palamentoyê çû cem parlamenterên DEM Partiyê û silav da wan.
Bahçelî 22yê mehê jî di civîna koma partiya xwe de got ku bila Ocalan li Parlamentoyê biaxive û ragihîne ku wî PKK tesfiye kiriye.
Piştî wê demê nîqaşên “pêvajoyeke nû” rojeve sereke ne lê zêdetir Bahçelî derdikeve pêş û Erdogan li ser mijarê tiştekî zelal nabêje.
Partiyên serekê yên mixalefetê bang dikin ku Serokkomarê Tirkiyeyê Recep Tayyîp Erdogan zêdetir li ser mijarê biaxive û pêvajoyê zelal bike.
“Êdî Bahçelî meke berdevk”
Serokê Giştî yê CHPyê Ozgur Ozel got, “Nabe ku pêvajo ji bo berjewendiya du kesan be” û berdewam kir:
“Em matmayî ne ku Birêz Erdogan cesaret nake du gotinan bike.
Erdogan, Bahçelî ya xwe got. Diyar e ku erkên nihênî hatine dabeşkirin.
Hinek jî dibêjin nakokî hene. Êdî erkê berdevk bi dawî bûye.
Erdogan neçar e ku derkeve û ji vî milletî re eşkere bike.
Em bang li Erdogan dikin, êdî Bahçelî meke berdevk, çi gotina te heye tu bibêje.”
“Êdî divê Serokkomar li ser vê mijarê biaxive”
Hevserokê Giştî yê DEM Partiyê Tuncer Bakirhan jî bi heman awayî bang li Erdogan kir ku li ser mijarê biaxive û got:
“Li gorî min divê êdî ev nîqaşên pêvajoya aştî û çareseriyê zelal bibin.
Ev pêvajo dê çêbibe yan çênebe, hemû gelê Tirkiyeyê di meraqê de ye.
Êdî divê Serokkomar li ser vê mijarê biaxive.”
“Em destûrê nadin”
Divê were gotin ku ÎYÎ Partî jî ji destpêkê ve bi awayekî tund li dijî “pêvajoya nû” derdikeve.
Serokê Giştî yê ÎYÎ Partiyê Musavat Dervîşoglu eşkere kir ku ew li dijî berdana Ocalan in û anî zimên:
“Kî çi plane dike bila bike, Abdullah Ocalan nikare ji wê kunê derkeve û nikarin wî bînin ser kursiyê Parlamentoya Tirkiyeyê.
Heta pê li laşê me nekin, em destûrê nadin vê yekê.”
Peyama Ocalan
Divê were bibîranîn ku Parlamenterê DEM Partiyê yê Rihayê Omer Ocalan 23yê Çiriya Pêşîn çûbû Îmraliyê.
Omer Ocalanê ku biraziyê Abdullah Ocalan e jî bi rêya hesabê xwe yê Xê peyama Ocalan ragihandibû û gotibû:
“Ev hevdîtineke malbatî bû. Birêz Ocalan li ser rûdanên siyasî nirxandineke bi giştî kir û xwest ku ez vê peyamê bigihînim:
‘Tecrîd berdewam dike. Şert çi dibin bila bibin hêza min a teorîk û pratîk heye ku ez vê pêvajoyê ji qada pevçûn û şidetê veguherim qada hiqûq û siyasetê.’”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse