Tirkiye
Başak Demirtaş Selahattin Demirtaş jî di nav de wêneyên 8 rêveber û parlamenterên berê yên HDPê belav kir
Hewlêr (Rûdaw) - Başak Demirtaş, hevjîna Hevserokê berê yê HDPê Selahattin Demirtaş li ser hesabê xwe yê Twitterê peyamek belav kir û got ev 2 hezar roj in Selahattin û hevalên wî bi neheqî girtî ne.
Başak Demirtaş 28ê Nîsana 2022ê li ser hesabê xwe yê Twîtterê hevjînê wê Selahattin Demirtaş jî di nav de wêneyên 8 rêveber û parlamenterên berê yên Partiya Demokratîk a Gelan (HDP) belav kir û got: “Bi giştî bû 2 hezar roj û hê jî di girtîgehê de ne. Bi awayekî neheq û bê hiqûqî rehîn hatine girtin. Sekna we ya bi serbilindî siberoja me ronî dike. 2 hezar caran bila Eşq be, 2 hezar caran silav li we be.”
Ligel biryara Dadgeha Mafên Mirov ya Ewropayê ya azadkirina Hevserokê berê yê HDPê Selahattin Demirtaş ev nêzîka 5 salane li Girtigeha Edirneyê girtiye û Doza Kobanî berdewam e.
Protestoyên Kobanî ku wek bûyerên 6-8ê Cotmehê jî tên binavkirin, 6-8ê Cotmeha 2014an ji aliyê HDPê û bi beşdarbûna xelkê Bakurê Kurdistanê hatibûn destpêkirin ku armanc ew bû dorpêça li ser Kobanî bi dawî bibe, korîdoreke mirovî ya alîkariyê li sînor bê vekirin û veguhastina çekan bo DAIŞê di ser sînorên Tirkiyê re were rawestandin.
Selahattîn Demîrtaş û Fîgen Yuksekdag ku hevserokên berê yên HDPê ne di doza Bûyerên Kobaniyê de ligel 108 endamên din ên HDPê tên darizandin ku 22 ji wan niha di girtîgehê de ne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse