Hewlêr (Rûdaw) - Berdevka Partiya Demokratîk a Gelan (HDP) Ebru Gunay ragihand ku di serdema proseya çareseriyê ya di navbera salên 2013 û 2015ê de budçeya şer kêm bibû û baweriya herkesê bi aşitiyê hebû. Gunay dibêje: “Xweşguzariya Tirkiyê wê demê 6 qat ji ya niha baştir bû, ji ber ku ji wê demê û heta niha budçeya şer 6 qat hatiye zêdekirin.”
Berdevka HDPê Ebru Gunay îro 28ê Nîsana 2022ê li Navenda Giştî ya partiya xwe civîna heftiyane saz kir û derbarê mijarên di rojevê de axivî.
Gunay ameje bi operasyona Pence Kilîd a Artêşa Tirkiyê ku ji 17ê Nîsanê ve li navçeyên sînorî yên Metîna, Zap û Avaşîn-Basyanê yên di nav axa Herêma Kurdistanê de bi hinceta hebûna gerilayên PKKê daye destpêkirin da û got: “Li dijî axa Herêma Kurdistanê polîtîkayên şer berdewam dikin. Tişta pêkenokî jî ew e ku bergê demokrasî û aramiyê li van polîtîkayên şer dikin. Gelê Rojhilata Naverast û Kurd baş dizanin ku bi polîtîkayên şer tank û topan demkorasî nayê.”
Bi gotina Ebru Gunay desthilata ku hebûna xwe bi şer ve girêdaye ji bilî mirin, wêrankarî û bêwariyê zêdetir tiştekî nade gelan û dibêje: “Di encama polîtîkayên şer ên desthilatê de her roj mirov dimirin û cenaze tên. Take armanca desthilatê ew e ku temenê xwe yê ku nemaye dirêj bike.”
Berdevka HDPê behsa proseya çareseriyê û bandora wê ya li ser rewşa aborî û aramiya Tirkiyê jî kir û got: “Di navbera salên 2013 û 2015ê de budçeya şer kêm bibû û baweriya herkesê bi aşitiyê hebû. Xweşguzariya Tirkiyê wê demê 6 qat ji ya niha baştir bû, ji ber ku ji wê demê heta niha budçeya şer 6 qat hatiye zêdekirin.”
Ebru Gunay eşekere jî kir ku di serdema proseya çareseriyê de budçeya şer 50 milyar lîre bûn, lê niha gihiştiye 290 milyar lîreyan û tekez kir: “Her dema ku li Tirkiyê budçeyên mezin bo şer hatine veqatandin, Tirkiye ber bi hejariyê ve çûye.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse