Hewlêr (Rûdaw) - Cade û kolanên bajarê Îzmîrê yê Tirkiyeyê di bin avê de man û di nav bajêr de belem tên bikaranîn.
Li navçeyên kêleka Deryaya Egeyê ya Îzmîrê, piştî baraneke gur asta ava Deryaya Egeyê bilind bû û şeva şemiyê ve jiyan rawestiyaye.
Mal, kargeh, baxçeyên avahiyan û parkên otomobîlan di bin avê de man.
Welatî gilî û gazinan dikin û dibêjin kesek nayê alîkariya me.
“Em bi belemê hatin”
Welatiyekê li ser rewşa bajêr got:
“Hemû kelûpelên me çûn. Em dê ji nû ve dest pê bikin. Tiştekî em bikin nîne û tiştek jî ji me re nayê kirin. Alîkarî jî nîne û tiştek jî nîne.”
Ji ber tijîbûna cade û kolanan bi avê li nav bajêr trafîk rawestiya û welatiyên ku asê mane ji aliyê tîmên parastina sivîlan ve têne rizgarkirin.
Welatiyekî jî anî ziman:
“Em li Alsancakê stranbêjiyê dikin û em asê man. Me telefonî parastina sivîlan kir û spas ji wan re alîkariya me kirin û em rizgar kirin. Em bi belemê hatin.”
Li Tirkiye û Bakurê Kurdistanê barîna barana gur berdewam e.
Li gorî Saziya Keşnasiyê ya Tirkiyeyê, roja yekşemê li piraniya bajarên Tirkiye û Bakurê Kurdistanê dê baran bibare û ji bo 67 bajaran di asta zer û pirteqalî de hişyariya barana gur hat dayîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse