TIRKIYE – Zêdeyî 720 hezar xwendekarî dest ji zanîngehê berdaye
Hewlêr (Rûdaw) - Li gor rapora YOKAKê ya derbarê zanîngehan de, salên 2021 û 2022yan li Tirkiye û Bakurê Kurdistanê zêdeyî 728 hezar xwendekaran dest ji zanîngehê berdaye.
Herî zêde jî li bajarên mezin xwendekaran dest ji zanîngehê berdaye.
Rapora Nirxên Nîşanker a Saziya Kalîteya Xwendina Bilind (YOKAK) rapora zanîngehan eşkere kir.
Li gorî medyaya Tirkiyeyê, sala 2021ê 338 hezar û 926, sala 2022yan jî 389 hezar û 564 xwendekaran dest ji zanîngehê berdaye.
Yek ji beşên herî balkêş ên raporê ew e ku xwendekaran herî zêde li bajarên mezin dest ji zanîngehan berdaye.
Li bajarên mezin, bi taybetî Stenbolê, dikarî bibêjî xwendekar her ji zanîngehan reviyane.
Di van du salên dawî de hejmara xwendekarên ku tenê ji Zanîngeha Stenbolê dest ji xwendinê berdaye nêzîkî 23 hezaran e.
Sala par herî zêde li Zanîngeha Egeyê xwendekaran dest ji zanîngehê berdabû.
Hejmara xwendekarên dest ji Zanîngeha Egeyê berdaye 12 hezar û 121 e.
Li gorî raporê sala 2022yan herî zêde xwendekaran dest ji van zanîngehan berdaye:
- Zanîngeha Egeyê: 12 hezar û 121 xwendekar
- Zanîngeha Uludagê: 11 hezar û 556 xwendekar
- Zanîngeha Kocaeliyê: 10 hezar û 902 xwendekar
- Zanîngeha Stenbolê: 10 hezar û 573 xwendekar
- Zanîngeha Enqereyê: 10 hezar û 175 xwendekar
- Zanîngeha Karabûkê: 10 hezar û 120 xwendekar
- Zanîngeha Suleyman Demîrelê: 8 hezar û 464 xwendekar
- Zanîngeha Dumlupinarê: 8 hezar û 379 xwendekar
- Zanîngeha Akdenîzê: 7 hezar û 870 xwendekar
- Zanîngeha Dokuz Eylulê: 7 hezar û 62 xwendekar
Ji xeynî wan zanîngehan, li Zanîngeha Marmaraayê, Zanîngeha Ataturkê, Zanîngeha Gaziyê, Zanîngeha Dîlokê, Zanîngeha Selçukê, Zanîngeha Haci Bayram Veliyê ya Enqereyê, Zanîngeha Mêrsînê û Zanîngeha Onsekiz Martê ya Çanakkaleyê jî zêdeyî 5 hezar xwendekaran dest ji zanîngehan berdaye.