Armanca serdana Erdogan a Bexda û Hewlêrê çi bû?
Enqere (Rûdaw) - Yek ji fermandarên berê yê artêşa Tirkiyeyê Mîthat Işik li ser serdana Erdogan a Bexda û Hewlêrê got, “Armanca Tirkiyeyê ew e ku PKK ji rojevê bê derxistin û îhtimal heye operasyon li Şingalê jî bê kirin.”
Herwiha karsaz Hakan Ak bal jî got, “Pêwendiyên Tirkiyeyê yên bi Herêma Kurdistanê re gelekî baş in û Hewlêr dikare wekî aktorekî sereke rola xwe bileyîze.”
Serokkomarê Tirkiyeyê Recep Tayyîp Erdogan doh piştî 13 salan çû Bexdayê û paşê hat Hewlêrê.
Recep Tayyîp Erdogan, bi rayedarên Îraq û Herêma Kurdistanê re gelek hevdîtin kirin.
Piştî seredana Serokkomarê Tirkiyeyê Recep Tayyîp Erdogan a Bexda û Hewlerê medyaya Tirkiyeyê herî zêde li ser 2 xalên vê serdanê sekiniye.
Yek ji wan mijaran mijara ewlehiyê û mijara PKKyê ye.
Mîthat Işik yek ji fermanderên xanenişîn ê artêşa Tirkiyeyê ye.
“Îhtimal heye operasyon bikeve aliyê Şingalê jî”
Mîthat Işik diyar kir ku Erdogan peyama herî giring li Hewlêrê daye û gotiye “ êdî pêwîst e PKK ji rojevê bê derxistin”.
Mîthat Işik wiha pê de çû, “Eger operasyonek bê kirin ne tenê dê li heremên Pençe - Kilîdê, ihtimalek heye ku operasyon bikeve aliyê Şingalê jî.
Heta ihtimal heye Îran jî beşdarî van operasyonan bibe û bi beşdariya Îran, Îraq , Tirkiye û rêveberiya Heremî ya Kurdan li dijî Qendîlê operasyonek bê kirin.
Armanca Tirkiyeyê ew e ku PKK ji rojevê derkeve û aramî were navçeyê.
Di navbera cîranan de bazirganî û geştyarî zêde bibe ev jî hemû girêdayî mijara ewlehiyê ne.”
Aliyekî din ê giring di seredana Erdogan de ku gelek karvedan hebûne aliyê bazirganî û bi taybetî jî projeya rêya bipêşketinê bû.
Li gorî amaran qebareyê bazirganiya Tirkiye û Îraqê, sala 2022yan 24,2 milyar dolar, sala 2023yan 20 milyar dolar û her sê mehên destpêka îsal derdora 4,3 milyar dolar e.
Piştî seredana Erdogan zêdebûna qebareyê bazirganî jî di rojevê de ye.
“Hewlêr dikare wekî aktorekî sereke rola xwe bileyîze”
Karsaz û Serokê Komeleya Karsazan Hakan Akbal got:
"Me wekî Komara Tirkiyeyê bi Herêma Kurdistanê re pêwendiyên gelekî baş hene.
Di serdema nû de jî di aliyê bazirganiyê de Hewlêr wekî aktorekî sereke dikare rola xwe bileyîze û rê li pêşiya diyaloga zêdetir bê vekirin. Daxwaza me jî ev e.”
Li gorî agahiyan, di dema serdana Erdogan de navbera Tirkiye û Îraqê 26 peyman hatin îmzekirin ku 4 ji wan li ser mijarên ewlehiyê ne.