Hewlêr (Rûdaw)- Rêveberiya yekemîn a saziya dadwerî û dozgeriyê li Tirkiyê (HSYK) roja 21ê adarê biryarek nû standin, li gor vê biryarê êdî di bin navê sîxortî û casûsiyetê yan jî guhdarkirina ne rewa de, rêxistina îstixbarata Tirkiyê (MÎT) dikare li hember karmendên ewlekariyê û jendirman çi li hundirê Tirkiyê û çi jî li derve, operasyon û lêpirsînan li dar bixin û dadgehkirina van dozên wiha jî dadgeha cezaya çaremîn a Enqerê xwedî erke.
Roja 22yê adarê derbarê tawana ku deng hatine tomar kirin û tomarên deng hatine revendin ji bo derve de, berpirsê rêveberiya darayî ku yek ji rayedarên operasyonên 17ê kanûna 2013an bû û tev 10 rêveberên beşan, ji kar hatin girtin û lêpirsîn bi wan re destpêkir.
Herwiha dîsa di heman rojê de, berpirsê saziya tekoşîna li dijî terorê û 21 karmendên wê saziyê ji kar hatin dûrxistin û ketin bin lêpirsînan û bi tometa ku zanyariyên operasyonan û îsbatên wê tine kirine, kopî kirine û ji derve re şandine, 51 berpirs û karmendên ewlekarî û polîsan ketine lêpirsînê.
Ji aliyekî din ji wan rêvebrên ewlekarî û polîsan ku ketibûn lêpirsînan 21 kes ji kar hatin avêtin û doz li wan hat vekirin û li tevahiya Tirkiyê di 22yê adarê de 40 rêveberên îstixabaratê yên polîsan dest li ser çekên wan hat dayîn û ew ji kar hatin dûrxistin.
Li hemberê van bûyeran û ji kar avêtina polîs û karmendên ewlekariyê, berpirsê ewlekariya bajarê Dêrsîmê Hayatî Yilmaz nameyek ji hikûmet û rêveberên xwe re nivîsand û daxwaza ji kar kişandinê kir.
Yilmaz di nameya xwe de ku li hemû medyaya Tirkiyê belav bûye de ragihand “Ew karmendên polîsan ku bi salane li dijî rundiyê û terorê şer dikin û hemû fedekariyên pêwîst dikin, bê ku tometeke wan hebe û bê agahî û iznên berpirsên wî ji kar tên dûrxistin yan jî ciyên wan tên guhertin”.
Yilmaz herwiha got “Ev kiryarên hikûmetê ne li gor rêveberiyên hemdemî ne û bandoreke nerînî û xirab li ser karmendan çê dike, ji ber wê jî ez daxwaza dest ji kar kişandinê ji erka xwe dikim”.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse