Li Tirkiyeyê sektora tekstîlê ketiye nava krîzeke mezin
Hewlêr (Rûdaw) - Li Tirkiyeyê sektora tekstîlê ji sedî 40 daketiye û ev jî rê li ber krîzên mezin vedike.
Bazirgan dibêjin gelek kompanya hatine girtin û gelekan jî karkerên xwe ji kar derxistine.
Tirkiye li seranserê cîhanê yek ji navendên girîng ên tekstîl û dirûtina cilûbergan e lê îsal ew bazar gelekî lawaz bûye.
Herwiha daxwaza welatên biyanî jî li ser cilûbergên Tirkiyeyê kêm bûye.
Nebûna bazarê, rêjeya berhemanînê ji serdî 30 daxistiye.
Karsaz dibêjin, bazara wan a serekî bazara welatên Yekîtiya Ewropayê bû û piştre jî Amerîka bû lê niha ew bazar sist bûne û rêjeya kirîna wan ji sedî 15an daketiye.
Sedem, gilî û gazinên wê bazarê di vê raporê de ne.
Bazirganên Tirkiyeyê ji nebûna bazarê nîgeran in
Serokê Encûmena Berhemhênerên Tekstîlê Şeref Fayat got:
“Ji welatên Yekîtiya Ewropayê daxwaz kêmbûne. Ev pirsgirêka sereke ya bazara me ye.
Ji ber sistbûna bazarên Ewropa û Amerîkayê, bazara cilûbergên amadekirî ji sedî 15 daketiye.”
Tirkiye salane ji sedî 70ê berhemên tekstîlê dişîne Brîtanya û welatên din ên Ewropayê lê îsal xuya dike ku ew rêje nagihe ji sedî 50 jî.
Ango her ku diçe hejmara karmendên ji kar hatine derxistin û kompanyayên tên girtin zêdetir dibe.
Bazirganê Cilûbergan Muhammed Alsan jî got:
“Li gorî par, îsal berhemanîn û firotin ji sedî 30-40 kêm bûye. Beşek ji kompanyayan hatine girtin û hinekan jî karmendên xwe kêm kirine.”
Di nîvê yekem ê îsal de hinartinaa berhemê sektora tekstîlê ya ji bo Ewropayê ji sedî 22.5 daketiye.
Serokê Komleya Karsazên Cilûbergan Hayatî Akbaba got:
“Bazara cilûbergan ji bo Tirkiyeyê hêzeke bibandor a dahatuyê ye.
Eger tedbîrên pêwîst neyên wergirtin, dê baweriya min a di warê aborî û hêza kar de xirabtir bibin.”
Sala 2022yan Tirkiyeyê bi bihayê 10 milyar û 400 milyon dolaran pêdiviyên xav ên ristinê û bi bihayê 21 milyar û 200 milyon dolaran cilûbergên amade hinarde kiribûn û bûbû pêncemîn hinardekarê herî mezin ê cilûbergan li cîhanê.