Hewlêr (Rûdaw) - Ajansa Nûçeyan a Demiroren (DHA) ku ajanseke fermî ya Tirkiyê ye, Ala Kurdistanê sansûr kir.
Roja Şemiyê Antî-Terora Kurdistanê bi daxuyaniyekê nav û wêneyê tohmetbarê serekî yê teqekerê Hewlêrê û hevkarê wî belav kir ku di wê bûyerê de dîplomatekî Tirk û du welatiyên Herêma Kurdistanê canê xwe ji dest dan û ragihand ku tohmetbar ji aliyê Rêveberiya Asayîşa Hewlêr û Dije-Terora Kurdistanê ve hatine girtin.
Ajansa Nûçeyan a Demiroren dema nûçe belav kir, sansûr xiste ser Ala Kurdistanê ku li pişt dîmenê herdu tohmetbaran hatibû danîn û medya Tirkiyê jî di belavkirina nûçeyê de pişta xwe bi dîmenên sansûrkirî yên wê ajansê ve girêdan.
Herwiha ev kiryara Ajansa Nûçeyan a Demiroren li ser medyaya civakî rastî nerazîbûna hejmareke zêde ya bikarhênerên Kurd hatiye. Beşek ji bikarhenêrê Kurd ên twîtterê li jêr nûçeya navborî Ala Kurdistanê belav kirine.
Ev di demekê de ye, Pêncşema borî 18ê Temûzê 9 geştyarên Başûrê Kurdistanê ji ber wênegirtina bi stûmalekê ku Ala Kurdistanê li ser bû ketin ber êrîşa hejmarek xelkên Trabzona Tirkiyê û ligel ku ketin ber êrîşê jî hatin desteserkirin.
Hikûmeta Herêma Kurdistanê daxwaz ji Komara Tirkiyê kir û wan welatiyan azad bike û bibîrxist ku Ala Kurdistanê di çarçoveya destûrê de îtîraf pê hatiye kirin û çendîn car ji aliyê Tirkiyê ve li firokexane û cihên fermî hatiye danîn. Rojek piştre hemû geştyarên Kurd hatin azadkirin.
Erbil'de Türk diplomatı şehit eden terörist ve 3 kişi yakalandıhttps://t.co/kpw1RRtkBM pic.twitter.com/N9AlHkOjEB
— Demirören Haber Ajansı (@dhainternet) July 20, 2019
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse