HDP bo Parlamentoya Tirkiyê: Desmalên kesk û sor û zer dibin sedema cezakirinê
Hewlêr (Rûdaw) - Parlamentera HDPê ya Riha ya Bakurê Kurdistanê Ayşe Surucu têkildarî girtinên li navçeya Esenyurtê ya Stenbolê ku di şahiyekê de zava û çend kesên din hatibûn desteserkirin pirsyarname pêşkêşî Parlamentoya Tirkiyê kir.
Parlamentera HDPê ya Rihayê Ayşe Surucu li ser hesabê xwe yê Twîtterê peyamek belav kir û diyar kir, desthilat dijmintiya Kurdan dike û bi hincetên pûç û vala wan dixe girtîgehan.
Surucu got, “Li Esenyurt-Stenbolê ji ber dijminatiya Kurdan a desthilatê bi ser şahiyan de tê girtin û ji ber desmalên kesk û sor û zer û stranên Kurdî welatî tên desteserkirin û cezakirin.”
Ayşe Surucu pirsên ku arasteyî parlamentoyê kirine bi vîdeoyekê parve kirin:
1- Desmalên kesk û sor û zer û şal dibe hinceta girtinê?
2- Bi ser de girtina şahiyekê li gor kîjan yasayê hatiye kirin?
3- Muzîka Kurdî dibe sedema girtinê?
4- Zava jî di nav de hinceta girtina wan kesan çi ye?
5- Derbarê mijarê de dê ti daxuyaniyek bê dayîn?
İstanbul/Esenyurt’ta iktidarın beslediği Kürt düşmanlığı yüzünden düğünler basılıyor, sarı,kırmızı,yeşil mendillerden ve Kürtçe müzikten ötürü insanlar gözaltına alınıyor ve tutuklanıyor.
— Ayşe Sürücü (@AyseSurucuUrfa) June 19, 2022
Bu hukuksuz ve ayrımcı yaklaşımı TBMM gündemine taşıdık. pic.twitter.com/8MdWoB0QIu
Li navçeya Esenyurtê ya Stenbolê 12ê Hezîrana 2022an polîsan bi ser cihê şahiyekê de girtibûn û di encam de zava jî ligel 10 kes bi hinceta desmalên kesk, sor û zer û stranên Kurdî desteser kiribûn û ji wan 9 kes bi biryara dadgehê bi hinceta ku "propagandeya rêxistinê" kirine hatibûn girtin.