Li Balafirgeha Stenbolê jina Kurd a bi Tirkî nizanibû hat ragirtin
Hewlêr (Rûdaw) – Dayîka Kurd a bi navê S.Ç. ya 80 salî li Balafirgeha Stenbolê, ji ber ku bi Tirkî nizanibû 2 demjimêr û nîvan hat ragirtin.
Kurê dayika Kurd got, “Bila ev şerma Tirkiyê be.”
Li Balafirgeha Stenbolê, S.Ç. a ku ji parêzgeha Wanê bi balafirê çû Stenbolê ji ber ku bi Tirkî nizanibû û karmendekî ku bi Kurdî dizanibû li balafirxaneyê nebû 2 demjimêr û nîvan hat ragirtin.
Kurê dayika Kurd dîmenên xwe û diya xwe li balafirxaneyê belav kirin û nerazîbûna li hemberî dijayetiya Kurdî nîşan da.
Dayik jî di dema hêrsbûna kurê xwe de bi Kurdî dibêje, “Tişt nabe ez qurban.”
Welatiyê Kurd wiha got:
“Binêrin, min li Balafirgeha Stenbolê ya ku dibêjin sêyemîn mezintirîn balafirgeha cîhanê ye, bi kesekî neda fêmkirin û nikarî dayika xwe ya reben 2 demjimêr û nîvan derxista.
Çima? Ji ber ku zimanê wê nebû, xwendin û nivîsandina wê nebû. Li welatê min, karmendê balafirê ku ez baca wê didim ji min re nebû alîkar.
Dayika min 2 demjimêr û nîv e li vê derê dîl e, min nikaribû ew derxista. Zimanê Ereban heye, zimanê Azeriyan heye, zimanê Îngilîzan heye lê zimanê dayika min nîne.
Dayika min nikaribû xwe bida fêmkirin û min nikaribû 2 demjimêr û nîvan wê ji pişt vî derî derxînim. Bila ev jî şerma Tirkiyeyê be, dê sibe dengan ji me bixwazin û bêjin em bira ne.”
Ev dayîkeke #Kurd e
— RudawKurdi (@RudawKurdi) February 18, 2024
📌 Tenê ji ber ku bi Tirkî nizane li Balafirgeha Stenbolê 2 saet û nîvan hatiye rawestandin
📌 Kurê wê îsyan dike pic.twitter.com/kZqQAJGoNi
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse