Hewlêr (Rûdaw) - Hevseroka HEDEPê ragihand ku ew dê di hilbijartinên şaredariyan de li deverên ku yekem û duyem derketine berbijêrên xwe nîşan bidin.
Hevseroka Partiya Wekhevî û Demokrasiyê ya Gelan (HEDEP) Tulay Hatîmogullari li bajarê Edeneyê yê Tirkiyeyê li ser hilbijartinên xwecihî yên Adara 2024an û pêkanîna hevpeymaniyan axivî.
Tulay Hatîmogullariyê ragihand ku ew dê di hilbijartinên şaredariyan de li deverên ku yekem û duyem derketine bi berbijêrên xwe beşdarî hilbijartinan bibin û got:
“Em li bajarên rojava yên Tirkiyeyê jî ji hevpeymaniyan re vekirî ne.”
“Em dê ji destê qeyûman derxin”
Tulay Hatîmogullariyê bal kişand ser qeyûman ku ev 2 serdem in li ser şaredariyên HDPyê tên danîn û got:
“Qeyûm li vî welatî êdî bûne rejîmek. Danîna qeyûman a ser şaredariyan tê wateya jê standina mafê bijartin û hilbijartinê yê welatiyan.
Em dê şaredariyên ku me bi ferqekî kêm winda kirine qezenc bikin û şaredariyên ku hatine bidestxistin jî careke din ji destê qeyûman derxin.”
Hevseroka HEDEPê bi bîr xist ku wan di hilbijartinên xwecihî yên sala 2019an û di hilbijartinên Gulana îsal de jî piştevaniya berbijêrên CHPyê kirine lê dema hevserok, şaredar, parlamenter û endamên encûmena şaredariyên partiya wan dihatin desteserkirin, CHPê piştgirî nedaye wan û li ser vê yekê jî rexne li wê partiyê girtin.
Tulay Hatîmogullariyê di berdewama axaftina xwe de nerazîbûna xwe ya li hemberî berdana Ogun Samastî kujerê Hrant Dînk nîşan da û anî ziman:
“Me ew kevok (Hrant Dînk) ku rojnamegerek bû ku bi tirsa kevekokê dijiya neparast. Ji ber vê yekê wîjdana me hemûyan nerehet e û aciz e.
Em bi hezaran caran ji Dînk, malbata wî û civaka Ermen daxwaza lêborînê dikin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse