Fezlekeyên 3 parlamenteran li parlamentoyê ne

Hewlêr (Rûdaw) - Fezlekeyên 2 parlamenterên Partiya Wekhevî û Demokrasiyê ya Gelan (HEDEP) û parlamentrekî Partiya Gel a Komarî (CHP) şandin Serokatiya Parlamentoya Tirkiyeyê.

Derbarê Parlamenterê Mêrsînê yê HEDEPê Alî Bozan, Serokwekîla Grûba HEDEPê û Parlamentera Erziromê Meral Daniş Beştaş û Parlamenterê CHPyê yê Stenbolê Kadrî Enîs Berberlîoglu fezleke hatibûn amadekirin.

Ev fezleke, bi armanca rakirina parêzbendiya wan ji aliyê Serokkomariya Tirkiyeyê hatibûn amadekirin.

Fezlekeyên derbarê her sê parlamenteran de, doh ji Serokatiya Parlamentoyê re hatin şandin.

Serokatiya Parlamentoyê jî dosyeyên fezlekeyan şandin Komîsyona Têkel a Parlamentoya Tirkiyeyê.

Komîsyona Têkel a Parlamentoyê ji endamên komîsyonên dad û destûrê pêk tê.