Hunermend Ferhat Tunç hat binçavkirin

Hewlêr (Rûdaw) – Hunermendê Kurd Ferhat Tunç duh bi şev dema ji Almanyayê vedigeriya, li balafirxaneyê hat binçavkirin û îro bo dadgehê hat veguhestin.

 

Hunermendê Kurd ê ji Dêrsimê Ferhat Tunç, duh bi şev dema ji Almanyayê vedigeriya li Balafirxaneya Ataturk a Stenbolê hatibû binçavkirin.

 

Ferhat Tunç li ser hesabê xwe yê Twitterê ragihand ku li balafirxaneyê jê re gotine ku "tu ji aliyê hêzên ewlehiyê ve têyî daxwazkirin" û dest bi rêkarên binçavkirinê kirine.

 

Tunç duh bi şev li binkeya polîsan a balafirxaneyê hatiye girtin û vê sibê bo dadgehê hatiye veguhestin.

 

Parêzerê Tunç, Fatma Hopikoglu ragihand ku hunermendê Kurd ji bo pişkinîna tendirustiyê bo nexweşxaneyê hatiye veguhestin û ji wir jî dê bo Dadgeha Bakirkoyê were veguhestin.

 

Fatma Hopikoglu eşkere kir ku sedema binçavkirinê ji ber du dosyeyên li Amedê ye, lê naveroka dozê nizanin.