Gergerlîoglu: Dema bi Kurdî be deng tê birîn lê Îngilîzî nayê birîn
Hewlêr (Rûdaw) - Parlamenterê DEM Partiyê yê Kocaeliyê Omer Faruk Gergerlîoglu bertek nîşanî Serokwekîlê Parlamentoya Tirkiyeyê da û got, “Dema ez li vê derê bi Kurdî diaxivim, hûn dengê min dibirin lê ez niha bi Îngilîzî axivîm we nebirî.”
Omer Faruk Gergerlîoglu 26ê Çiriya Paşîn a 2024an li Parlamentoya Tirkiyeyê çend gotinên bi Kurdî û kiribûn lê Serokwekîlê Parlamentoya Tirkiyeyê Bekîr Bozdag dengê wî birîbû û nehiştibû ku bi Kurdî biaxive.
Gergerlîoglu doh dema gotûbêjên budceya 2025an li parlamentoyê nerazîbûn nîşanî qedexeyên li ser zimanê Kurdî da û got:
“Welatiyên Kurd diçin nexweşxaneyan, wergêrê Kurdî nîne. Wergêr deynin û bila pirsgirêk çareser bibe, bi welatî derdê xwe bibêjin.”
“Derdê we ew e ku bi Kurdî neyê axaftin”
Gergerlîoglu pişt re behsa bazirganiya di navbera Tirkiye û Îsraîlê de kir û bi Îngilîzî got: “Stop Fueling Genocide.”
Gergerlîoglu ji Bekîr Bozdag re got, “Ez bi Îngilîzî axivîm û we dengê min nebirî lê dema ez bi Kurdî diaxivim hûn dengê min dibirin.
Derdê we ne axaftina bi Tirkî ye, derdê we ew e ku bi Kurdî neyê axaftin.”