Hewlêr (Rûdaw) – Dadgeha Mafên Mirov a Ewropayê (DMME), di “Komkujiya Şirnexê” de Tirkiye mehkûm kir. Li gorî vê biryarê, Tirkiye dê 2 milyon û 305 hezar euro wek ziyanî bide wan malbatan her wiha 5 hezar û 700 euro jî wek xercên dadgehê bide mexdûran.
DMMEê derheqê doza kuştina 41 welatiyên kurd ên ku di encama bombardimana Kuşkonar û Koçaxilî yên girêdayî Şirnexê de jiyana xwe ji dest dabûn, biryar da.
Di rûniştina îro (12.11.2013) ya dozê de biryar hat dayîn ku Tirkiye madeyên 2, 3, 38 û 46 ên Peymana Mafên Mirov a Ewropayê binpê kiriye.
Di çerçoveya biryarê de dê Tirkiye 2 milyon 305 hezar euro tazmînat bide 38 dozdaran û her wiha 5 hezar û 700 euro jî xercê dadgehê bide mexdûran.
Di rojên 26 û 27ê Adara 1994an de, gundên Koçaxilî û Kuşkonar ên bajarê Şirnexê yê Bakûrê Kurdistanê ji aliyê balafirên şer ên artêşa tirk ve hatibû bombekirin û di encamê de 15 kes li gundê Koçaxilî û 26 kes jî li gundê Kuşkonarê jiyana xwe ji dest dabûn.
Piştî bûyerê rayedarên fermî ragihandin ku kempên PKKê dane ber bombeyan lê gundiyan salixî dan ku balafir û teyareyên leşkerî gundên wan bombebaran kirine. Doza vê bûyerê ku wek “Komkujiya Şirnexê” tê naskirin, ji aliyê gundiyan ve li DMMEê hat vekirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse