Li Bakurê Kurdistanê û Tirkiyê sala nû ya xwendinê dest pê kir
Hewlêr (Rûdaw) -
Li Bakurê Kurdistanê û Tirkiyê, îro Duşemê sala nû ya xwendinê ya 2022-2023 dest pê kir. Îsal jî weke salên berê, dê zarokên Kurd li Bakurê Kurdistanê, ne bi zimanê Kurdî lê bi zimanê Tirkî bixwînin.
Wezareta Perwerdeya Tirkiyê ragihand, wan hemû amadekarî kirine ji bo destpêkirina xwendinê û di sala nû ya xwendinê de 1.2 milyon mamoste li tevahiya dibistanên hikûmî û taybet dê dest bi kar bikin.
Rêveberê Platforma Perwerdeya Amedê Prof. Ezîz Yagan beşdarî bultena Rûdawê bû û li ser destpêkirina sala xwendinê axivî.
Îsal li Tirkiyê û Bakurê Kurdistanê ji bo dersa bijardeya Kurdî tenê 3 mamoste hatine damezrandin.
Ezîz Yagan diyar kir ku ew dixwazin di warê pêşxistina Kurdî de girîngî bi mamosteyên Kurdî were dayîn lê Wezareta Perwerdehiyê heta niha ti gav neavêtine.
Ezîz Yagan li ser damezrandina 3 mamosteyên Kurdî got, “Ji bo 20 hezar xwendekarên dersa Kurdî tenê 3 mamoste ne tiştek e lewra me daxwaza 200 mamosteyên Kurdî kiriye.”
Ji bo zimanê ne Tirkî jî mamoste tên damezrandin ku ji bo zimanê Îngîlîzî hezar û 4 mamoste, bo zimanê Erebî 175 mamoste, bo zimanê Almanî 1 mamoste û bo zimanê Kurdî jî tenê 3 mamoste tên damezrandin.
Ezîz Yagan anî ziman, “Damezrandina 3 mamosteyan dê bandoreke neyînî li ser hilbijartina dersa Kurdî bike û dê salên pêş de kêmtir xwendevan dersa Kurdî hilbijêrin.”
Ezîz Yagan destnîşan kir ku divê dayik û bavên Kurd israrê li ser dersa Kurdî bikin.