Binali Yildirim bû Serokê Parlementoya Tirkiyê

RÛDAW

Navenda Nûçeyan  – Serokwezîrê Berê yê Tirkiyê  û Parlementerê AK Partî yê Îzmîrê Binali Yildirim di gera sêyem a dengdanê de bi 335 dengan, weke Serokê Parlementoya Tirkiyê hat hilbijartin.

 

Îro li Parlementoya Tirkiyê dengdana hilbijartina Serokê Parlementoyê hat kirin.

 

Di gera yekem û duyem a dengdanê de ji bo diyarkirina Serokê Parlementoyê hejmara pêwîst pêk nehat û di gera sêyem de 584 parlementer beşdarî dengdanê bûn.

 

Parlementerê AK Partî yê Îzmîrê Binali Yildirim 335 deng, Parlementerê CHPê yê Stenbolê Erdogan Toprak 135 deng, Parlementera HDPê ya Sêrtê Meral Daniş Beştaş 63 deng, Parlementerê ÎYÎ Partî yê Stenbolê Hayrettin Nuhoglu 40 deng û Parlementerê Partiya Seadetê yê Stenbolê Cihangir Îslam 5 deng wergirtin.

 

Binali Yildirim di dengdana gera sêyem de bi 335 dengan, weke 28emîn Serokê Parlementoya Tirkiyê hat hilbijartin.