Hewlêr (Rûdaw) - Wezîrê Tenduristiyê yê Tirkiyeyê ragihand di bûyerên trafîkê yên betlaneya Cejna Remezanê de 13 hezar û 192 kes birîndar bûne.
Li Tirkiye û Bakurê Kurdistanê 9 roj betlaneya fermî ji bo Cejna Remezanê hat ragihandin.
Piraniya welatiyan ji bo ku cejnê bi xizmên xwe yên li bajarên din re derbas bikin ketin ser rêyan û beşek ji wan di rê de bi otomobîlên xwe qeza kirin.
Wezîrê Tenduristiyê yê Tirkiyeyê Fahrettîn Koca beşek ji amarên derbarê ew kesên ku di wan qeza û bûyerên trafîkê de birîndar bûne belav kirin.
Koca ragihand ku di betlaneya cejnê de ji bo telefona 112 a hawarçûna tîmên tenduristiyê 10 hezar û 456 agahdarkirinên bûyerên trafîkê hatine û bi giştî di wan bûyeran de 13 hezar û 192 kes birîndar bûne.
Wezîrê Tenduristiyê yê Tirkiyeyê Fahrettîn Koca got:
“Ji bo birîndaran xizmeta dermankirina destpêkê li cihê bûyeran hatiye dayîn û ji bo nexweşxaneyan hatine veguhastin.
Hejmara bûyerên trafîkê gelekî zêde ne û encam cihê xemgîniyê ye.”
Wezîrê Tenduristiyê yê Tirkiyeyê bangî şofêran jî kir ku ji bo silametiya canê xwe û xizmên xwe pabendî tedbîrên trafîkê bibin.
Wezîrê Karên Navxwe yê Tirkiyeyê Alî Yerlîkaya jî danê sibehê ragihandibû ku di 6 rojên betlaneya cejnê de 3 hezar û 706 bûyerên trafîkê çêbûne û 48 kesan canê xwe ji dest daye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse