Ciwanan li ber Şaredariya Stenbolê astengkirina muzîka Kurdî şermezar kirin

Hewlêr (Rûdaw) – Komek ciwanên Kurd li Stenbolê li hember astengkirina muzîka Kurdî ji aliyê polîsên şaredariya wî bajarî ve, li ber avahiya Şaredariya Bajarê Mezin a Stenbolê kom bûn û nerazîbûna xwe nîşan dan.

Duh Çarşembê 10ê Tebaxa 2022, li Qada Taksîm a Stenbolê komek ciwanên Kurd ku muzîka Kurdî lêdixistin, ji aliyê polîsên şaredariya bajêr ve hatibûn astengkirin.

Îro ew ciwanên Kurd ji bo protestokirina wê kiryara polîsê şaredariya Stenbolê û astengkirina muzîka Kurdî, çûne ber avahiya Şaredariya Bajarê Mezin a Stenbolê ya li Sarçhaneyê.

Ciwanan astengiya polîsan bo muzîka Kurdî protesto kirin û gotin ku ya wan kiriye ne karekî şaş e.

Herwiha ciwanan li ber avahiya Şaredariya Bajarê Mezin a Stenbolê bi Kurdî govend gerandin.

Ev nerazîbûna ciwanan bala xebatkarên Şaredariya Stenbolê jî kişand ser xwe.

Gelek xebatkarên Şaredariya Stenbolê ji pencereyê li çalakiya ciwanên nerazî temaşe kirin.