Tirkiye
Serokê Herêma Kurdistanê Nêçîrvan Barzanî serdana Tirkiyê dike û di Foruma Dîplomasî ya Antalyayê de amade dibe. Grafîk: Rûdaw
Hewlêr (Rûdaw) - Serokê Herêma Kurdistanê, Nêçîrvan Barzanî îro bi serdanekê diçe Tirkiyê û dê beşdarî di Foruma Dîplomasî ya Antalya de bike.
Bi serpireştiya Wezareta Derve ya Tirkiyê û di bin navnîşana Xêzkirina Dîplomasiyê de, îro Înê 11ê Adara 2022an duyemîn Foruma Dîplomasî ya Antalyayê destpê dike û dê heta 13ê Adarê bo dema 3 rojan bidome.
Di forumê de Serokê Herêma Kurdistanê Nêçîrvan Barzanî ligel 12 serokkomar û serokwezîrên welatan beşdar dibe.
Di kevana wê forumê de dê çendîn hevdîtin di navbera serkirdeyên welatan de bên sazkirin û Nêçîrvan Barzanî jî dê li gel hejmarek serok û serkirdeyên welatên cîhanê bicive.
Di forumê de behsa krîzên cîhanî wek şer, hejarî, koçberbûn, guhertina keşûhewayê, teror û gefa grûpên tundrew û çend mijarên din bê kirin.
Roja yekem a forumê bi gotareke Serokkomarê Tirkiyê Erdogan û Wezîrê Derve yê wî welatî Mevlut Çavuşoglu destpê dike û paşê dê sê panelên cuda bên lidarxistin.
Wezîrê Derve yên Rûsyayê Sergey Lavrov û Wezîrê Derve yê Ukraynayê Dmyto Kuleba jî di Foruma Dîplomasî ya Antalyayê de beşdar in.
Serokê Ukrayanyê Volodymyr Zelensky bi online beşdarî di panela sêyem a roja destpêka forumê de ya bi navnîşana Berdêla Aştiyê Yan Lêçûnên Şer dike. Di heman panelê de Sekreterê Giştî yê NATOyê Jens Stoltenberg, Serokkomarê Nîjeriya Mihemed Bazom û Serokkomarê Sloveniyayê Borot Pahor beşdar dibin.
Di duyemîn Foruma Dîplomasî ya Antalyayê de zêdetir ji 2000 kesan amade dibin, 12 serokkomar û serokwezîr, 64 wezîrên derve, berevanî û enerjiyê, 11 serokkomar û serokwezîrên berê û pêştir, Sekreterê Giştî yê NATO, berpirsên ajansên navdewletî yên Netewên Yekbûyî, berpirsên bilind ên Yekîtiya Ewropayê, hejmarek siyasetvan, kesayetên akademîk, bazirgan, şêwirmendên pilebilind ên serkirdeyan, medyakar, rojnamevan, pisporên enerjî, aborî, darayî û jîngehê û çalakvan di forumê de amade dibin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse