Hewlêr (Rûdaw) - Di Doza Kobanî ku li Kampusa Girtîgeha Sîncanê hat kirin de daxwaza azadkirinê hat redkirin û dadgehê biryar da derbarê parlamenterê Partiya Çepên Kesk yê Stenbolê Sirri Sureyya Onder de daxwazname bê nivîsandin.
Xula 3emîn a rûniştina 25emîn a Doza Kobaniyê ku 108 siyasetmedar bi hinceta bûyerên Kobaniyê yên di 6-8ê Cotmeha 2014an tên darizandin û di nav de hevserokên berê yên HDPê jî hene birêve çû.
Di dozê de parêzeran daxwaza azadkirina kesên tên darizandin kirin lê ev yek ji aliyê dadgehê ve hat redkirin û biryar hat dayîn ku 3ê Temûza îsal rûniştina dozê bêkirin.
Herwiha dadgehê biryar daye, ji ber Sirri Sureyya Onder wek parlamenter hatiye hilbijartin ji bo rakirina biryara kontrola edlî û rawestandina darizandina wî bo Parlamentoya Tirkiye daxwazname bê nivîsandin.
Protestoyên Kobanî ku wek bûyerên 6-8ê Cotmehê jî tên binavkirin, 6-8ê Cotmeha 2014an ji aliyê HDPê û bi beşdarbûna xelkê Bakurê Kurdistanê hatibûn destpêkirin ku armanc ew bû dorpêça li ser Kobanî bi dawî bibe, xeteke însanî ya alîkariyê li sînor bê vekirin û veguhastina çekan bo DAIŞê li ser sînorên Tirkiyê were rawestandin.
Li gor raporta Komelaya Mafên Mirovan a 7-12ê Cotmeha 2014an di encama van bûyeran de bi giştî 46 kesan canê xwe ji dest dabûn, 682 kes birîndar bibûn û 323 kes jî hatibûn desteserkirin. Herwiha li gor amarên ajansa fermî ya Tirkiyê yên wê demê zerar gehiştibû 1113 avahiyan jî.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse