Hewlêr (Rûdaw) - Li navçeya Sariyerê ya ser bi parêzgeha Stenbolê ya Tirkiyê ve, şeva 5ê Temûzê zilamekî piştî ku hevjîn û xwesûya xwe kuşt, xwe jî kuşt.
Li gor zanyariyan doh bi şev li Taxa Pinar a navçeya Sariyerê di navbera zilamê bi navê E.Ş. û hevjîna wî N.Ş. de nîqaş derket û piştî demekê ew nîqaşa di navbera wan de tund bû û veguherî şer.
Hatiye ragihandin, piştî tundbûna nîqaşê û şerê wan, kesê bi navê E.Ş. bi çifteyê hevjîna xwe N.Ş. û xwesûya xwe ya bi navê S.Ş. kuşt û piştre bi heman çekê xwe jî kuşt.
Li ser agahdarkirinê, tîmên tendirustiyê û polîs bo cihê bûyerê hatin şandin.
Termên her sêyan bo nexweşxaneyê hatin veguhestin.
Qeymeqamtiya Sariyerê jî di daxuyaniyekê de ragihandiye, bûyer li Taxa Pinarê di demjimêr nêzîkî 19:45 de çê bûye û piştî agahdarkirinê tîmên tendirustiyê û hêzên emnî bo cihê bûyerê hatine şandin.
