Hewlêr (Rûdaw) - Li navçeya Çeşme ya Îzmîrê li rojavayê Tirkiyê ku devereke geştyariyê ye, teyrok û zîpikê erd spî kir. Di demekê de ku xelk li benda germbûna hewayê bûn, teyrokê lê kir û welatî matmayî man.
Hinek kes vê yekê bi guherîna keşûhewayê ve girê didin, hinek jî dibêjin êdî ew nema karin pêşbîniya keşûhewa û werzan bikin û divê fêrî rewşa nû bibin.
Di meha Nîsanê de ku xelk li bendê ne hewa germ bibe, ji nişka ve teyrokeke zêde barî û welatî matmayî man.
Ev navçe yek ji navendên geştyariyê yên bi nav û deng e li Tirkiyê.
Welatiyek bi navê Berna Cengiz ragihand, “Ez matmayî mame! Ez bi xwe xelkê Deryaya Reş im û di vê demsalê de tiştekî wiha li wir jî ne normal e, li vir dîtina tiştekî wiha ez matmayî hiştim. Wiha diyar e em jî di nav krîza guherîna keşûhewayê de ne.”
Herçiqas Rêveberiya Keşnasiya Tirkiyê hişyarî dabû ku egera barîna baranê heye, lê xelkê vê deverê ne li benda barîneke bi vî awayî bûn û hinek ji welatiyan berê xwe dane peravên deryayê, daku dîmenên balkêş ên teyrokê li pey xwe hiştine bibînin.
Niyazî Turhan yek ji wan kesan e û dibêje: “Ez Îzmîriyekî 37 salî me, cara yekê ye tiştekî wiha dibînim. Ez di şokê de me, hatime wê bibînim. Ez wiha difikirin ev girêdayî guherîna keşûhewayê be.”
Serokê Şaredariya Bajarê Mezin a Îzmîrê jî li ser hesabê xwe yê medya civakî derbarê barîna terokê de peyamek belav kiriye û nivîsiye: “Di Nîsanê de dîtina van dîmenan, tê wê wateyê ku krîza guherîna keşûhewayê ne li ber deriyê me lê di jiyana me de ye.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse