Nifûsa Tirkiye û Bakurê Kurdistanê diyar bû

Hewlêr (Rûdaw) - Nifûsa Tirkiye û Bakurê Kurdistanê îsal 2024an li gorî par 292 hezar û 567 kes zêde bûye û bûye 85 milyon û 664 hezar û 944.

Saziya Amaran a Tirkiyeyê (TUIK) encamên 2024an ên Pergala Qeyda Nifûsê ya li Gorî Navnîşanê eşkere kirin.

Li gorî vê, nifûsa Tirkiye û Bakurê Kurdistanê ji 2023yan û pê ve 85 milyon û 372 hezar û 377 bû, par 292 hezar û 567 kes zêde bû û derket 85 milyon û 664 hezar û 944 kesan.

Her wiha rêjeya nifûsa mêran wekî ji sedî 50,02 (42 milyon û 853 hezar û 110 kes), rêjeya nifûsa jinan jî wekî ji sedî 49,98 (42 milyon û 811 hezar û 834 kes) hat qeydkirin.

Rêjeya zêdebûna nifûsê ya 2023yan ji hezarî 1,1 sala 2024an bû ji hezarî 3,4.

Rêjeya şêniyên navendên navçe û parêzgehan 2023yan ji sedî 93 bû û lê 2024an derket ji sedî 93,4an.

Rêjeya şêniyên bajarok û gundan jî ji sedî 7an daket ji sedî 6,6an.

Nifûsa biyaniyên li Tirkiyeyê dimînin li gorî sala çûyî 89 hezar û 996 kes kêm bû û bû milyonek û 480 hezar û 547 kes.

Nifûsa Stenbolê bû 15 milyon û 701 hezar û 602

Nifûsa Stenbolê bi qasî 45 hezar û 678 kesan zêde bû û gihişt 15 milyon û 701 hezar û 602 kesan.

Stenbol ku ji sedî 18,3yê nifûsa Tirkiyeyê lê dijî, li pey wê bi 5 milyon û 864 hezar û 49 kesan Enqere, bi 4 milyon û 493 hezar û 242 kesan Îzmîr, bi 3 milyon û 238 hezar û 618 kesan Bursa û bi 2 milyon û 722 hezar û 103 kesan Antalya tê.

Bayburt bi 83 hezar û 676 kesan bû bajarê herî kêmnifûs.

Li pey vî bajarî, bi 86 hezar û 612 kesan Dêrsim, bi 91 hezar û 354 kesan Erdexan, bi 142 hezar û 617 kesan Gumuşhane û bi 156 hezar û 739 kesan Kilîs tê.

Li aliyê din, Riha bi 21,4 salan parêzgeha xwedî temenê navîn ê herî kêm e.

Piştî Rihayê, Şirnex bi 23 salan û Agirî û Sêrt bi 24,5 salan tên.

Bajarê Bakurê Kurdistanê yê nifûsa wî herî zêde Riha ye

Bajarên Bakurê Kurdistanê yên nifûsa wan herî zêde ev in:

Li gorî amaran, Riha bi 2 milyon û 237 hezar û 745 kesan di rêza yekem de ye.

Dîlok bi 2 milyon û 193 hezar û 363 kesan di rêza duyem de ye.

Amed bi 1 milyon û 833 hezar û 684 kesan di rêza sêyem de ye.

Mereş bi 1 milyon û 134 hezar û 105 kesan di rêza çarem de ye.

Wan jî bi 1 milyon û 118 hezar û 87 kesan di rêza pêncem de ye.

Bajarê Bakurê Kurdistanê yê nifûsa wî herî kêm Dêrsim e

Her wiha, li gorî amaran bajarên Bakurê Kurdistanê yên ku nifûsa wan herî kêm in jî ev in:

Li gorî vê yekê, Dêrsim bi 86 hezar û 612 kesan, Kilîs bi 156 hezar û 739 kesan, Îdir bi 206 hezar û 857 kesan û Erzingan jî bi 241 hezar û 239 kesan di nav bajarên ku nifûsa wan herî kêm de ne.

Li gorî salên 2023 û 2024an rêjeya nifûsê ya parêzgehan wiha ye:

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger