Saziya Keşnasiyê ya Tirkiyê ji bo 5 rojan hişyariya baranê da
Hewlêr (Rûdaw) - Saziya Keşnasiyê ya Tirkiyê ji bo seranserê wî welatî bo dema 5 rojan hişyariya baranê da û dibêje li parêzgehên Çanakkale, Balikesir û Bursayê yên Tirkiyê egera lehiyê heye û divê li gor vê yekê tedbîrên pêwîst bên wergirtin.
Saziya Keşnasiyê ya Tirkiyê îro Înê 5ê Gulana 2023an ragihand ku li giştî herêmên Tirkiye û Bakurê Kurdistanê do dema 5 rojan baran dibare û li çend parêzgehên Bakurê Kurdistanê jî ligel baranê toz dibare.
Li gor daxuyaniya saziya navborî, ji sibê 6ê Gulanê û pê ve di nav 5 rojan de li seranserê Tirkiyê baran dibare û li parêzgehên Çanakkale, Balikesir û Bursayê eger heye lêhî çêbibe.
Herwiha li çend parêzgehên Bakurê Kurdistanê jî dê toz dibare û mesafeya dîtinê dê kêm bibe û ji bo çûnûhatina welatiyan hişyarî hatiye dayîn.
Tê pêşbînîkirin ku li herêmên Tirkiyê pileya germê di navbera 3 heta 5 pileyan dakeve û li Bakurê Kurdistanê jî pileya germê di navbera 2 heta 4 pile zêde bibe.