Li Antalya ji ber şewata daristanan gund tên valakirin

Antalya (Rûdaw) - Şewata Daristanên dewruberê bajerê Antalyayê li başûrê Tirkiyê hêj berdewam e. Piştî navçeya Manavgatê, li navçeya Gundogmuş jî Daristan dişewitin. Hewlên tîmên agirkujiyê jî ji bo kontrol kirina şewatê berdewam e.

Meşxelên agirê daristanên navçeyên Antalyayê her ku diçe mezintir dibin. Navçe û gund û mezrayên herêmê di bin dûkêlekê reş û bêhna dijwar a şewîtina daristanan de maye, li daristaneke nêzîkî navçeya Gundogmuşê agir zêde dibê lê dengê alikariyê gellek kêm digihe rayedaran.

Tevî tîmên hikûmetê yên agirvemirandinê, kesên xwebexş jî ji bo vemirandina agir alîkariyê dikin.

Îhsan Erdem yek ji wan kesan e, ew dibêje, “Em ji gundên manavgatê hatin. Me got em alîkariya gundên cîran bikin. Lê pêwîstî bi tîmên şareza heye. Eger bixwazin agirî kontirol bikin pêwîste kanaleke mezin vekin, bo vê jî pêwîste tîmên agirkujiyê werin.”

Hûsnû Çalişkan, welatiyekî navçeyê ku cotkar e, gazinan dike, ku hewldanên bo vemirandina agir têrê nakin. Hûsnû diyar kir, “Ji vî Milî ve agir tê bo nava gundê me. Çi midaxele nahên kirin. Doh bo me dozerek şandin me hindek pêşîya agirî girt lê îro dozer jî nehat.”

Li gundê Karabulê yê ser bi navçeya Gundogmîşê ve, xelkê gundî şepirze ne ji ber ku li hember gundê wan daristan dişewite û ew hêdî hêdî dikevine ber doprêça agir, neçar in ku gundê xwe vala bikin.

Hasan Erdem, xelkê gund ku bi cotkariyê debara jiyana xwe peyda dike, dibêje, “Em çi bikin, me bi neçarî hindek kelûpelên pewîst berhev kirin. Em diçin cihekî ewleh, em jî nizanin çi bikin Xwedê alikariya me bike.”

Ji 28 Tîrmehê ve li navçeyên Anatalyayê, Manavgat, Gundogmuş, Serîk, Aksekî û Alanyayê şewata daristana berdewam e. Hikumeta Tirkiyê bi piştigirya alikariyê nêwedewletî û derfetên xwe hewla vemirandina agirên daristanan dide.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger