Li Stenbolê agir bi depoyekê ket
Hewlêr (Rûdaw) - Îro berê sibehê li navçeya Çatalcayê ya Stenbolê agir bi depoya kargehekê ket.
Ew kargeh li Taxa Çakilê ya navçeya Çatalcayê ye ku navçeyeke qerebalix e û hejmareke zêde ya kargeh û ofîsên bazirganiyê lê hene.
Li gorî zanyariyan, îro ber destê sibehê ji ber sedemeke nediyar agir bi depoya kargeha kaûçikan ket.
Tîmên parastina sivîlan çûn cihê bûyerê û wan piştî nêzîkî du demjimêran agir kontrol kir.
Hat ragihandin ku polîsan dest bi lêkolînê kiriye û îfadeya çend kesan hatiye wergirtin.
Li gorî amarên Serokatiya Parastina Sivîlan a Şaredariya Bajarê Mezin a Stenbolê, sala 2022yan li wî bajarî 22 hezar û 554 bûyerên şewatê hatine tomarkirin.
Di encama wan şewatan de 6 hezar û 572 mal, 2 hezar û 103 kargeh û hezar û 797 otomobîl şewitîne.