Hewlêr (Rûdaw) - Bi sedan xelkê Siweydayê dijî daxuyaniya Serokwezîrê Îsraîlê ya ji bo nehiştina çekan a li başûrê Sûriyeyê xwepêşandan kirin.
Xwenîşanderan alayên nû yên Sûriyeyê bilind kirin û sloganeke wan dibêje "Gelo başûr jî hat firotin wekî ku Golan firotin. Helwêsta hikûmeta Şamê çi ye?"
Serokwezîrê Îsraîlê hefteya borî çek û hêzên hikûmeta nû ya Sûriyeyê parêzgehên başûrê Sûriyeyê nemînin û Durzî jî bên parastin.
"Divê helwêsteke wê ya diyar dijî Netanyahu hebûya"
Xwenîşander Nîdal Ebû Subih got, "Em bi hêvî bûn ev hikûmeta ku xwe li ser Sûriyan ferz kiriye û me soz daye li gel wê saziyên hikûmetê ava bikin, divabû helwêsteke wê ya diyar dijî Netanyahu hebûya.
Ev xaka Sûriyeyê ye û em xelkê Siweydayê ji ti kesî pêwîstiya me bi bawernameya niştîmanperweriyê nîne.
Em niştîmanperweriyê li xelkê belav dikin, divê hikûmet helwêsta xwe beramberî vê erda Sûriyeyê xuya bike."
"Em qebûl nakin ne Netanyahu gefê li me bixwe"
Xwenîşander Cîhad Meddah wiha anî ziman:
"Em bangawaziya xwe dişînin ji bo birayên xwe yên hikûmeta Sûriyeyê, bêdeng mebin, bêdeng mebin, van daxuyaniyan şermezar bikin, van binpêkirinan dijî serweriya Sûriyeyê şermezar bikin.
Em qebûl nakin ne Netanyahu û ne xeynî Netanyahu gefê li me bixwin, li Neteweyên Yekbûyî û Konseya Ewlehiyê gilî bikin. Xelk kar dike hûn jî kar bikin."
Heta niha Hikûmeta Sûriyeyê daxuyaniya Netanyahu protesto nekiriye, tenê daxuyaniya Kongreya Diyaloga Niştîmanî ya Sûriyeyê gotinên wî red kirine û daxwaza kiribû ku artêşa Îsraîlê ji nav başûrê Sûriyeyê vekişe.
"Em paşguhkirinê qebûl nakin"
Emîrê Gundê Dar Arayê Hesen el-Etreş wiha axivî:
"Ji kêmî wê yekê em qebûl nakin divê em li vî welatî hevbeş bin, Sûriyeyê ya me ye.
Em neviyên şoreşgêr û xebatkaran in. Em ti cudakarî û paşguhkirinê ne ji hikûmetê û ne ji aliyekî din ve qebûl nakin.
Em welatî ji bo parastina kerameta her welatiyekî daxwaza mafên xwe dikin.
Divê ti kes neyê jinavbirin, me ev qonax derbas kir. Divê îro em li gel hev bin, divê hezkirin û aştî bicîh bibe."
23yê vê mehê Serokwezîrê Îsraîlê Benjamin Netanyahu daxwaz kir çek û hêzên hikûmeta nû ya Sûriyeyê li her sê parêzgehên başûrê Sûriyeyê Quneytre, Deraa û Siweydayê nemînin.
Netanyahu di heman demê de xwestibû ku Durzî li Sûriyeyê bên parastin û rê li ber wan bê vekirin da ku li Îsraîlê kar bikin.
Di 18ê vê mehê de jî artêşa Îsraîlê 7 pêgehên xwe li navçeya bê çek a di navbera her dû welatan de û li parêzgeha Quneytreyê ava kirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse