Kargeha cil û bergan\ Wêne û vîdeo: Rûdaw
Hewlêr (Rûdaw) - Li Ukraynayê, di kargeheke taybet a cil û bergên leşkerî de hemû terzî jin in û di nav sê salan de wan cil û berg û pêdiviyên taybet ên leşkerî ji bo zêdetirî 10 hezar jinan re çêkirine.
Irina Nikorak serperiştiya vî karî dike û di heman demê de Parlamentera Ukraynayê ye.
Ew her wiha seroka rêxistineke taybet a çêkirina cil û bergên leşkerî ye.
Li gorî gotina Nikorak, sedema hilbijartina vî karî ew e ku cil û bergên leşkerên jin neguncaw bûn lewma wê bi alîkariya xelkê û çend rêxistinên din pêwîst dît ku vî karî bike.
“Her tişt li gorî mêran hatiye çêkirin”
Siyasetmedar Irina Nikorakê behsa vê serpêhatiyê kir û ji Rûdawê re got:
"Dema min zanî jinên parastvan ên di nav artêşa Ukraynayê de neçar in cilên binî yên mêran û cilên leşkerî yên wan li xwe bikin û her tişt li gorî şiklê laşê mêran hatiye çêkirin.
Min biryar da ku vê rewşê biguherim.
Ji ber ku piştî êrişê bi hezaran jin bi dilxwazî tevlî artêşê bûn û ev yek didome.
Her wiha li Ukraynayê 4-5 kargehên me hene ku yelek ên taybet ji bo jinan çêdikin."
Voktoria Runa ku çend rojan berê ji eniya şer a nêzîkî Bakhmutê vegeriyaye, 26 salî ye û ji 19 saliya xwe ve di nav hêzên Ukraynayê de ye.
Ew niha fermandeya tabûreke mêran e. Ew dibêje tevî ku rêxistin giringiyê didin cil û bergên leşkerî yên jinan, pêwîst e hemû tişt ji aliyê hikûmetê ve were dabînkirin.
“Amûrên me yên paqijiyê nînîn”
Fermandara leşkerî Viktoria Runayê Rûdawê re wiha got:
"Ez bawer im me behsa piştgiriyê kir. Jineke ku bixwaze beşdarî artêşê bibe, divê bizane ku herî kêm xizmetguzariyên bingehîn jê re tên dabînkirin.
Divê cil û bergekî rihet hebe di dema şer de, ji wê jî zêdetir ji ber ku ev cihekî şer e.
Wekî cebilxane û pêdiviyên paqijiyê, ji ber ku amûrên me yên paqijiya taybet ên jinan jî nînin.
Ezmûna min bi jinên leşkerî yên Amerîkayê re heye, çanteyên wan ên taybet hene, şampû û cilên jinê tê de hene.
Mixabin tiştekî bi vî rengî li cem me tuneye û heta niha jî bi dest nakevin."
Nêzîkî 100 hezar jin di nav hêzên ewlehiyê û artêşa Ukraynayê de hene.
Sala borî ji sedî 20 xwebexşên ku tevlî hêzên Ukraynayê bûn jin bûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse