Hewlêr (Rûdaw) - Serokê Mala Êzidiyan a Helebê Menaf Cefer ragihand ku metirsî li ser Kurdên Êzidî yên li Helebê heye û çarenivîsa malbata Hesen Nebo ne diyar e.
Li bajarê Helebê ji ber şer û pevçûnên dawî, Kurdên Êzidî rûbirûyê krîzeke giran a mirovî û ewlehiyê bûne.
Heta niha 5 endamên Kurdên Êzidî yên Asayîşa Rêveberiya Xweser hatine girtin û çarenivîsa malbateke 7 kesî jî ne diyar e.
Serokê Mala Êzidiyan a Helebê Menaf Cefer ji Rûdawê ragihand ku rewşa Kurdên Êzidî li bajêr metirsîdar e û got:
“5 endamên Êzidî yên Asayîşa Rêveberiya Xweser ji roja înê ve, ji aliyê Artêşa Sûriyeyê ve hatine girtin."
"Agahî ji malbateke 7 kesî nayê wergirtin"
Menaf Cefer diyar kir ku metirsî li ser jiyana malbateke Kurd a Êzidî ya 7 kesî jî heye.
Kurdê Êzidî Hesen Nebo, dayîka û hevjîna wî û çar zarokên wî ji roja şemiyê ve winda ne.
Li gorî agahiyan, rêya derketina ji bajarê Helebê li ber wê malbatê hatiye girtin û ji wê demê ve pêwendî bi wan re qut bûye.
800 malbat koçber bûn
Ji ber aloziyan pêleke mezin a koçberiyê jî dest pê kiriye.
Menaf Cefer eşkere kir ku heta niha nêzîkî 800 malbatên Kurdên Êzidî ku hejmara wan nêzîkî 5 hezar kesan e, ji malên xwe çûne û berê xwe daye gundewarên Efrînê.
"Mala Êzidiyan hat talankirin"
Li gel metirsiyên li ser jiyana sivîlan, binpêkirin li dijî saziyên civaka Êzidiyan jî hatine kirin.
Serokê Mala Êzidiyan a Helebê ragihand ku navenda "Mala Êzidiyan" a li Helebê ku saziyeke civakî ye, ji aliyê komên çekdar ve hatiye talankirin.
Menaf Cefer di dawiyê de hişyarî da û got:
"Metirsiyeke mezin li ser jiyana kesên ku li hundirê bajarê Helebê mane heye.
Malbatên windayan û saziyên Êzidî bangî aliyên pêwendîdar û rêxistinên mafên mirovan dikin ku ji bo eşkerekirina çarenivîsa malbata Hesen Nebo û berdana endamên girtî yên asayîşê, hewlên xwe bidin."
